طالبان گروهی تمانیدن بیر هییت چین گه سفر قیلگن

Image copyright Reuters

طالبان رسمیلری بی بی سی نینگ اسلام آباد ده گی مخبری طاهرخان گه ایتیشیچه، اوتگن ییلی نوامبر آییده قطردن بو گروهی نینگ بیر هییتی چین بیلن ایکله تمانلمه مناسبتلر و طالبان نینگ موقعینی بیان ایتیش مقصدیده، او مملکت گه سفر قیلگن.

طالبان ملازملریگه کوره، بو هییت طالبان نینگ قطرده گی سیاسی نماینده لیگی دن قاری دین محمد حنیف باشچیلیگیده عملگه آشیریلگن.

طالبان گروهی بو سفر باره سیده کوپراق تفصیلات بیرمه گنلر.

قطرده طالبان نینگ سیاسی نماینده لیگی فعال، بوندن بو گروه نینگ نماینده لری فرانسه و ایرانگه سفر قیلیشگن.

اوتگن آیده رسانه لر بیلن بیر خبری کنفرانس آرقه لی، چین نینگ افغانستان اوچون مخصوص نماینده سی طالبان بیلن مذاکره قیلینیشی کیره کلیگی نی سوره ب، اوز مملکتی بو حقده همکارلیکده تیار ایکنی باره سیده تاکیدله گن.

افغانستان جمهور رییسی محمد اشرف غنی، تحلیف مراسمی دن سونگ چینگه قیلگن اوزی نینگ ایککینچی سفریده، او مملکت نینگ افغانستان صلح جریانیگه احتمالی یاردم کورستیشی باره سیده منتدارچیلیک بیلدیردی.

غنی جنابلری نینگ خبرنگارلرگه ایتیشیچه، پاکستان بیلن یقین علاقه ده بولگن چین افغانستان ده صلح تامینلنیشی ده مهم رول اوینه آله دی.

اونینگ تاکیدلشیچه، چین افغانستان گه بیر خلق ارا شیریک صفتیده مسوولیتلی عمل قیلیشی ممکن.

یقین پیتلرده بعضی بیر رسانه لرنینگ خبر بیریشیچه، افغانستان ملی بیردملیک حکومتی و طالبان نفرلری مخفی شکلده مذاکره لرنی باشله گنلر.

معلوماتلرگه کوره، بو مذاکره لر بیرلشگن ملتلر تشکیلاتی نظارتی آستیده طالبان نینگ سیاسی حیاتگه قیتیشی خصوصیده بجریلگن.