طالبان نينگ قدمي چينگه هم ييتدي

Image copyright

رسمي پكين طالبان معماسيگه ايچيم تاپيش ايسته گيني آشكارا بيان قيلرايكن، حركت نينگ مخصوص هييتي هله قچان چين ده بولگن.

اگر، طالبان نينگ اوزلريگه ته نيلسه، چين تمانيگه "اسلامي اميرليك نينگ موقعي ني توشينتيريب قوييشگن".

خبرلرگه كوره، طالبان هييتيگه حركت نينگ قطرده گي سياسي اداره سي وكيلي قاري دين محمد باشچيليك قيلگن.

اما پيكينده تمانلر عينآ نيمه لر محاكمه ايتيشگني و قنده ي قرارگه كيليشگني تفصيلاتلري معلوم ايمس.

دنيانينگ ايككيته قدرتلي دولتيدن بيرته سي بولگن چين ايسه، اوتگن نوامبر آييده بو كبي نيتيني اظهار ايتگندي.

رسمي پيكين بو يولده اوزي نينگ اقتصادي قدرتيني هم ايشگه ساليشيني بيان قيلگندي.

افغانستان، پاكستان و طالبان حركتيني مذاكره لرگه كيلتيريشي اوچون منطقه ده قيمتي 100 ميليارد دالردن آرتيق لايحه لرگه قول اوريش ريجه سيده ايكنيني هم بيلديرگندي.

بوگونگه كيليب بوي كورسته ياتگن خبرلردن عيان بوليشيچه، طالبان هييتي نينگ چينگه سفري هم خوددي اوشه پيتده، يعني نوامبر آيي يكونيده عملگه آشگن.

ينگي ديپلماتيك سعي وحركتلر افغانستان ني كتته سانده گي خارجي اتفاق قشونلري ترك ايتيب بولگن. طالبان ايسه، بوتون افغانستان بويلب قيته فعاللشيشگه موفق بولگن بير منظره ده كوزه تيلماقده.

مملكتي قيته زوره وانليكلر گيردابيگه باتيب باررايكن، چين افغانستان نينگ ينگي جمهور رييسي اشرف غني طالبان بيلن تينچليك مذاكره لرده دسته گيني سوره ب، بيرينچيلردن بوليب سفر قيلگن دنيا نينك ايكيته دولتي دن بيرته سي بولگندي.

جمهور رييس اشرف غني بو مسله ده اينگ اولا رسمي پيكين نينگ اسلام آباد گه بولگن كتته تاثيري و ييريك اقتصادي قدرتيگه كوز تيككندي.

اوز نوبتيده، هم حربي و هم اقتصادي جهتدن قنچه ليك قدرتلي بولمه سين، شونداق بيقينيده گي افغانستان ده گي وضعيت نينگ قنده ي توس آليشي، ييللركه، قالگن اكثريت منطقه دولتلري كبي چين نينگ هم دقت اعتباريده گي اساسي مسله لردن بيري بوليب كيلدي.

منطقه وي تحليلچيلرگه كوره، رسمي پيكين چيگره آشه ارزان افغان آقيمي و اويغور اسلامي بولگينچيليگي نينگ ينه ده كوچه يب، چين ملي خوفسيزليگيگه تهديد ساليشي ممكنليگي دن جدي خواطرده.

بيراق، بوگون دنيا ده ايگه للب تورگن اقتصادي و حربي قدرتيگه قره مه ي، بو مسله ده چين نينگ نيمه لرگه قادر بوليشيني سوال آستيگه آله ياتگن تحليلچيلر هم يوق ايمس.