افغانستانده بيرارته هم خارج عسكري قالمسليگي ممكن مي؟

Image copyright AFP

افغانستان جمهور ریيسی اشرف غني نينگ ايتيشيچه، اگر شرايط امكان بيرسه، قالگن خارجي اتفاق قشونلري 2016 ييل آخريگچه افغان توپراغيده اوشلب تورمسليگي ممكن.

اوزبيكستان داخل منطقه دولتلري ايسه، خارجي كوچلرنينگ افغانستان ني بوتكل ترك ايتشيدن خواطرده.

جمهوررییس غني بوحقده امريكانينگ سي بي اس تلويزيون كاناليگه بيرگن صحبتي چاغيده بيلديرگن.

عينن افغان رهبري ورسمي واشنگتن اورته سيده اوتگن ييل آخريده امضالنگن مهم خوفسيزليك بيتمه ايسه، 13.000 گه يقين خارجي اتفاق قشونلري واولر قطار حربي بعضيلرنينگ افغانستانده 2016 ييل نينگ سونگيده قدر قاليشلريني كوزده توته دي.

افغانستان سابق ريس جمهوري حامد كرزي اوشبو كيليشووني امضالشني قريب بيرييلچه آرتگه سورگن، مذكور حالت دولت آره سيده گي مناسبت لرگه جدي نفاق سالگندي.

امريكا رهبريتي ايسه، رسمي كابل سوزلريگه قولاق توتمسه، شوييل باشيگه قدر افغانستانده بيرار بيرحربي ليك قالمسليگي بيلن تهديد هم قيلگندي.

شوباعث هم، اوتگن ييل سپتامبرآييده افغانستانده اقتدارگه كيليشي آرتيده مذكوربيتمني امضالشي ينگي افغان ريس جمهوري نينگ كتته يوتوغي صفتيده بهالنگندي.

افغان توپراغيده قاليشي ريجه لنگن قشون نينگ اكثريتيني ايسه، امريكا حربي لري تشكيل ايتيشه دي.

غرب باشچيليگيده گي اتفاق قشونلرنينگ 2014 ييلگي عاموي سفربرليگي ويريم ييلليك سيلاو بحراني سبب، بوتون افغانستان بويلب طالبان واونينگ اتفاقچيلري قيته فعاللشيشگه موفق بوليشركن، هرايككي تامان هم چيت ايلليك حربي لري نينگ افغان توپراغيده كميده ايككي ييل قاليشلري مهم ليگيني اورغولشگندي.

آره ده امريكا ريس جمهوري باراك اوباما افغانستان ده كيله جك خارج ليك حربي لرنينگ وكالت لريني هم كينگه يتيرگن، اوزلريگه خوف سالگن تقديرده، طالبلرگه قرشي جنگ آليب باريشلريگه هم ايزن بيرگندي. بوگونگه كيليب، ريس جمهورغني نينگ اوزتلويزيون صحبتيده ايتيشيچه، انه شوخوفسيزليك بيتيميده كوزده توتيلگن مدت «قيته قوريب چيكيليشي» ممكن. افغانستان رهبريگه كوره، «يكوني مهلت، ديگني – قاتيب قالگن نرسه بولمسليگي كيره ك».

شونده ي ايكن، ريس جمهور اشرف غني نينگ بوگونگي موقعي نيمه ني انگله ته دي؟- توركيه دن سياسي تحليلچي، سابق افغان ديپلوماتي عبدالسلام آثم بوو باشقه سيلاولرگه منه بونده ي جواب بيره دي:

اوتگن ييلگي سفربرليككه طالبان امريكا باشچيليگيده گي اتفاق قشونلري نينگ مغلوبيتي صفتيده بهابيرگن.

اوزنوبتيده، «قالگن اشغالچي كوچلرني هم سيقيب چيقه ريب، افغانستان ده صاف اسلامي دولت برپا ايتيشگه» وعده قيلگن.

«اگر، هرايككي تامان وياكه قطار اتفاقچيلريميز اوزآلديلريگه قويگن مقصدلريني عده لشسه وحقيقيتدن هم ثمره بيرسه، بيتيمده كوزلنگن مدتني قيته كوريب چيقيشگه باريليش ممكن»،- ديب ايتگن جناب غني.

باراك اوباما نينگ بوندن قنچه ليك آگاه ايكني حقيده سوره لگنده ايسه، افغانستان رهبري: "ريس جمهور اوباما ميني بيله دي. بوني بير- بيريميزگه ايتيب اوتريشميزنينگ حاجتي يوق"،- ديب جواب بيرگن.

سونگگي ييللرده افغانستان مساله سيگه تيز- تيز اعتبار قره ته ياتگن اوزبيكستان ريس جمهوري اسلام كريموف هم يقينده قيلگن چيقيشيده عاموي سفربرليك آرتيدن هم، خارجي اتفاق قشونلري نينگ افغان توپراغيده قاليشلري مهم ليگيني اورغولگندي.

اوزبيكستان رهبري قوشني افغانستان ده گي واقعه لري نينگ رواجي بوني تقاضا ايتيشيني بيان قيلگندي.

Image copyright Reuters

رسمي تاشكينت خارجي اتفاق قشونلري بوتكل چيقيب كيتيشسه، شونداققينه بيقينلريده جايلشگن افغانستان نينگ بنگاور، تورلي گروهلر اويه سيگه ايله نيشي وفقرالر اوروشي گردابيگه باتيشيدن خواطرده.

اوزبيكستان تاماني افغانستانده گي بيقرارليكلر آرتيدن طالبلرنينگ قدرتگه كيليشي اوزمملكتي بيلن باغليق گروهلرنينگ جانله نيشي سبب بوليشيدن هم جدي تشويشده.

سونگگي ييلده امريكا باشچيليگده گي اتفاق قشونلرنينگ 2001 ييلگي اشغالي آرتيدن، افغانستان دن پاكستان گه قاچيب اوتگن وطالبان حركتي نينگ يقين اتفاقچيسي صفتيده كوريلاوچي اوزبيكستان اسلامي حركتي قيته فعاللشيشگه موفق بولگن.

Image copyright AP

حركت يقينده حاضر دنياده گي "اينگ باي وقدرتليسي"، ديب كوريلوچي عراق وسوريه ده گي "اسلامي دولت" گروهيني دستكلشيني هم رسما بيان قيلگن.

حركت حاضر افغانستان نينگ عينااوزبيكستان گه توتش شمالي منطقه لريگه قه يتيشي وحتي، قندوزكبي ولايتلريده اوز قرارگاه لريني تيكلشگچه بارگني ايتيله دي.

افغانستان طالبان توزومي عملده بولگن 90- ييللر اورته لريده رسمي تاشكينت نينگ جدي خواطرلريگه سبب بولگن گروه، ايريم منطقوي تحليلچيلرگه كوره، بوگون مركزي آسيا وافغانستان چيگره سيده ينگي بزه لريني اورنه تيشگه اورينماقده.

جمله دن، اصلي پاكستان ليك تحليلچي احمد رشيد افغانستان بيلن قريب 2.000 چقيريم ليك چيگره گه ايگه ايكن ليكلريني نظرده توتيب، تهديد قرشي سيده اينگ ضعيف مملكت- تاجيكستان، اوزبيكستان وتركمنستان، دييدي.

تحليلچي گه كوره، اولر تاجيكستان جنوبي، پاكستان شمالي- غربيده گي چيگره وافغانستان شرقيگه آسان گينه قول اوزه تيش ممكن بوله ديگن ييريك حدودني ايگه لب آليش ايستگي ده لر.

ريس جمهور كريموف ايسه، سونگگي چيكيشلريده افغانستانده گي وضعيت عراقده گيسي كبي توس آليب كيتيشيدن هم جدي خواطر بيلديره باشله گن