افغانستان ینگی حکومتی کابینه سینی پارلمانگه رسمآ تنیشتیردی

Image copyright EPA

افغانستان جمهور رییسی محمد اشرف غنی تحلیف مراسمیده کابینه سینی 45 کون ایچیده پارلمان گه تنیشتیریشینی وعده قیلگندی. اما بوگون اشرف غنی اوزی نامزد وزیرلرنی پارلمانگه تنیشتیردی.

جنرال شیرمحمد کریمی

شیرمحمد کریمی، مدافعه وزیرلیگیگه نامزد. او 69 یشر بولیب، پشتون قومیگه منسوب. او خوست ولایتیده دنیا گه کیلگن. او کابل حربی تعلیم درگاهیده تحصیل آلگن و 1342 ییلدن بویان افغانستان مدافعه وزیرلیگی نینگ تورلی ساحه لریده وظیفه بجرگن.

سردار محمد رحیمی

سردارمحمدرحیمی، تجارت وزیرلیگیگه نامزد. رحیمی جنابلری ارزگان ده دنیا گه کیلگن. 37 یشر بولگن رحیمی ملی بیردملیک حکومتی نینگ اینگ یاش وزیری دیر. او دکتورا سینی جیوپولیتیک بوییچه تهران ده اوقیگن.

فیض محمد عثمانی

فیض محمد عثمانی، حج و اوقاف وزیرلیگیگه نامزد. او 42 یشر بولیب، قندوزده دنیا گه کیلگن. عثمانی تورکمن قومیگه منسوب. او سیاست بوییچه لیسانس حجتیگه ایگه و بیلیم یورت استادی صفتیده تدریس قیلماقده.

داوود شاه صبا

داوود شاه صبا 51 یشر بولیب هرات ده توغیلگن. او پشتون قومیگه منسوب. صبا جنابلری زمین شناسلیک بوییچه دوکتور بولیب، اوتگن ییللرده هرات حاکمی و جمهور رییس نینگ مصلحتچیسی صفتیده ایشله گن.

نورالحق علومی

نورالحق علومی، 68 یشر بولیب، افغانستان جنوبیده گی قندهار ولایتیدن. علومی جنابلری افغانستان خلق دموکراتیک حزبی نینگ یوقاری مرتبه لی اعضاسی ایدی. اوشه پیتلر قندهار والیسی صفتیده وظیفه بجرگن. علومی جنابلری افغانستان ملی متحد حزبینی 2003 ییلده اساس قوییب، 2005 ییلده قندهار اهالیسی نینگ نماینده سی صفتیده پارلمان گه یول تاپدی.

او تحصیلاتینی کابلده بیتیریب، کومونیستی دورده یوقاری مرتبه لی قوماندانلردن بیری ایدی.

فیروز الدین فیروز:

فیروز الدین فیروز 46 یشر بولیب، تاجیک قومیگه منسوب. او پنجشیر ولایتیده دنیا گه کیلگن و رهبرلیک ومدیریت بوییچه بریتانیاده تحصیل آلگن. او ساغلیق نی سقلش وزیرلیگی ده معاون صفتیده ایش آلیب بارگن و بیر مدت هم ساغلیق نی سقلش وزیرلیگیده دنیا بانکی مصلحتچیسی صفتیده وظیفه بجرگن.

صلاح الدین ربانی

صلاح الدین ربانی 43 یشر بولیب، کابلده توغیلگن. او تاجیک قومیگه منسوب. مکتب مدرسه نی پاکستانده اوقیگن. اما مارکیتینگ و مدیریت بوییچه سعودی عربستانیده تحصیل قیلگن. ربانی جنابلری 1378 ییلده عربستان و عرب امیرلیگی دولتلریده گی خصوصی شرکتلرده ایشله گن. اما اوندن کیین، بیریتانیا نینگ کینگستون بیلیم یورتی ده ماسترلیک بوییچه دوام ایتدیرگن. او شونینگ دیک، نیویارک کلمبیا بیلیم یورتی ده خلق ارا علاقه لر بوییچه حجت قولگه کیریتگن. صلاح الدین ربانی آته سی تیرور قیلگنی آرتیدن، افغانستان صلح عالی کینگشی رییسی صفتیده تعیینلندی. او بوندن آلدین افغانستان نینگ بیرلشگن ملتلر تشکیلاتیده دایمی سیاسی نماینده سی صفتیده ایش باشلب، تورکیه ده هم ایلچیسی صفتیده ایشله گن.

آی سلطان خیری

Image copyright BBC World Service

آی سلطان خیری، اخبارات ومدنیت وزیرلیگیگه نامزد. او 5 یاشیده یولیب، فاریابده توغیلگن. او اوزبیک بولیب، تورکی تیلی ادبیاتی بوییچه دوکترا.

فیض الله کاکر

فیض الله کاکر، مخدرماده لرگه قرشی کوره ش وزیرلیگی گه نامزد بولیب، فاریابده تولد تاپگن. او 60 یشر، داکتر و اوتمیشده جمهور رییس نینگ مصلحتچیسی صفتیده ایشله گن.

نجیبه ایوبی

نجیبه ایوبی، عیاللر وزیرلیگی گه نامزد. خانم ایوبی 46 یشر بولیب، پروان ده تولد تاپگن. او فارس تیلی ادبیاتی بوییچه تحصیل آلگن. ایوبی خانم حاضر کلید گروپ رییسی بولیب، رادیو کلید و کلید گزیته لری نی رهبرلیک قیله دی.

عباس بصیر

عباس بصیر، فواید عامه وزیرلیگی گه نامزد. او 46 یشربولیب، غزنی ده توغیلگن. بصیر جنابلری هزاره قومیگه منسوب. جمهور رییس نینگ معاونی اداره سی معاونی و بیلیم یورت استادی صفتیده ایشله گن.

قمرالدین شینواری

قمرالدین شینواری، ننگرهار ده دنیا گه کیلگن. او 52 یشر بولیب، پشتون قومیگه منسوب. او شرعیات بولیمیده تحصیل آلگن.

فیض الله ذکی

فیض الله ذکی، ترانسپورت وزیرلیگی گه نامزد. او اوزبیک قومیگه منسوب بولیب، کابلده دنیا گه کیلگن. ذکی جنابلری زمین شناسلیک بوییچه تحصیل قیلگن. کیین سیاست گه کیریب، ملی جنبش حزبی اعضالریدن بولگن.

برنا کریمی

برنا کریمی، 41 یشر بولیب، کابلده توغیلگن. او مخابرات وزیرلیگیگه نامزد. مدرسه نی کابل ده اوقیگن. کیین امریکا نینگ فینیکس بیلیم یورتینی بیتیرگن.

سردار محمد رحمن اوغلی

رحمن اوغلی، اقتصاد وزیرلیگی گه نامزد. او 50 یشر بولیب، فاریاب ده توغیلگن. رحمن اوغلی اوزبیک قومیگه منسوب. او رادیو تلویزیون بولیمیده تحصیل آلگن. او بوندن آلدین فاریاب اهالی سیرنینگ پارلمان ده گی نماینده سی ایدی.

کابینه رویخطیدن اوچ نامزد وزیر استعفا بیریشدی. جیلانی پوپل نینگ اورنیگه ایکلیل حکیمی مالیه وزیری صفتیده، محمود صیقل نینگ اورنیگه عبدالرحمن صالحی سوو وبرق وزیری نامزدی صفتیده اعلان قیلیندی. شونینگ دیک، بو رویخط ده زراعت وزیرلیگی نامزدی اسمی اعلان قیلینمه دی.

Бу мавзуда батафсилроқ