باش قاره لاوچیلیک: فسادگه باتگنلر رویخطی توزیلمه گن

افغانستان باش قاره لاوچیلیک اداره سی فسادگه باتگن شخصلرنینگ اسم شهرتلرینی جمهور رییسلیک سراییگه یوبارگنلیگی حقیده گی گزارش نی رد ایتگن.

بو اداره سی سوزچیسی گه کوره، اوتگن بیر نیچه هفته ایچیده تورت نفر قاره لاوچی فساد ده عیبلنیب، قماققه تشلنگن.

افغانستان باش قاره لاوچیلیک اداره سی بیرقطار رسانه لرده جمهور رییس اشرف غنی گه فسادگه باتگن بیرتعداد خادملرنینگ اسم شهرتلری او اداره تمانیدن یوباریلگنی حقیده گی گزارشلرنی رد ایتیب، بوحقده هیچ قنده ی رویخط موجود ایمس دییدی.

بو اداره سی سوزچیسی بصیر عزیزی نینگ بوگون کابلده بیر مطبوعات ییغینیده، باش قاره لاوچیلیک اداره سی خادملری نینگ دوسیه لرینی تیکشیریش ایشی جمهور رییس نینگ ایشی ایمس بلکه بو اداره گه باغلیک ایکنی نی ایتدی:"بو ییرده قارلاوچی موجود، اداره میزده گی فساد ده باتگن شخصلرنینگ دوسیه لرینی اوزیمیز تیکشیره میز. بوحقده رویخط تیارلنمه گن. شخصلر باره سیده حجت و گواه لر موجود بولسه اوشه اوزی حجت حسابلنه دی، شو حجت اوستیده ایش آلیب باریله دی".

عزیزی جنابلری باش قاره لاوچیلیک ده فساد یوقلیگی نی رد ایتمه دی، اونگه کوره، اوتگن بیرنیچه هفته ایچیده 8 نفر فساد ده عیبلنیب، قولگه آلینگن و اولردن تورته سی نی قاره لاوچیلردن عبارت.

اونینگ ایتیشیچه، بولردن بیرتعدادی نینگ دوسیه لری تیکشیرو آستیگه آلیگن و بیرتعدادلری هم محکمه گه یوباریلگن.

باش قاره لاوچیلیک اداره سی سوزچیسی، ایکی آیدن بویان فساد ده عیبلنگن آلدینگی کابینه وزیرلریدن ییتی ته سی نینگ دوسیه لرینی عالی محکمه گه جونه تیلگنینی معلوم قیلدی.

بو شخصلرنینگ دوسیه لرینی تیکشیریش اوچون مخصوص محکمه ایجاد ایتیلیشی نظرده توتیلگن، اما هنوز گچه ایجاد بولمه گن.

جمهور رییس اشرف غنی اوزی نینگ کمپاین جریانلری همده قسم یاد مراسمیده مردمگه فساد نی یوقاتیشی باره سیده وعده بیردی.

جمهور رییس حاضرگه قدر کابل بانک دوسیه سی قیته کوریب چیقیلیشی و ملی مدافعه وزیرلیگی نینگ یانیلغی شرطنامه لری توخته تیلیشی نی سوره گن، اما هنوزگچه نتیجه لری معلوم قیلینمه گن.

Бу мавзуда батафсилроқ