کرزی: افغانستان تشقی سیاستی پاکستان تاماندن باشقریلیشینی خواه لمه یمیز

Image copyright Reuters

سابق افغانستان جمهور رئیسی حامدکرزی پاکستان باسیم لریگه تن بیریشنی افغانستان خلقی نینگ بریتانیا وشورالرگه قرشی آلیب باریلگن کوره شلرینی اهمیتی نی کمیتیریشی بیلن آگاه لنتیردی.

اوبوباره ده گی اظهاراتنی بریتانیالیک گاردین کونده لیگیده بیلدیریلگن.

کرزی جنابلری بریتانیاده گی نشرایتیله دیگن گاردین کونده لیک بیلن اوتکزگن صحبتیده بومملکت بیلن دوستلیک علاقه لری کوچه ییشیگه طرفدار بولیشنی ایتیب اما پاکستان تاثیری آستیده بولیشنی قبول قیلمسلیگی نی ایتگن.

سونگی آیلرده ملی بیرلیک حکومتی قوشنی پاکستان بیلن اوزعلاقه لری یخشی له نیب مستحکمله نیشی اوچون آلیب باره یاتگن سعی وحرکت لرعملگه آشه یاتگن بیرپیتده کرزی جنابلری تاماندن بوکبی مناسبت بیلدیریلماقده.

کرزی اوشبو صحبتیده زوره وانلیک دن نفرتله نیب و تینچلیکنی خواه له شینی ایتگن.

او شورالرقشونی بیلن جنگ آلیب بارمه گن تقدیرده مملکت بوگونگی وضعیتدن یخشی راق وضعیتده بولیشی ممکن لیگی نی ایتگن.

شو نینگ دیک کرزی جنابلری خارجی سیاست نی بومملکت اوزی باشقرمه گنده بریتانیا وشوروی بیلن آلیب بارگن اوروش لرمعناسیزبولیشینی ایتگن.

کرزی افغانستان دولتی تاماندن افغان حربی لرینی پاکستانگه تعلیم بیریش اوچون یوباریلیشی باره سیده گی حرکت لرینی تنقیدلب خودکش کیشی لرنی افغانستانگه یوباره دیگن مملکت گه حربی لرنی تعلیم اوچون یوباریش ضرورایمسلیگی نی تاکیدله دی.

افغانستان دولتی اوتگن آی افغانستان ملی اردوسیدن 6نفرنی پاکستانگه جونتدی.

حالبوکی کرزی نینگ حاکمیتی دوریده افغان ملی اردوعسکری لری تعلیم آلیش اوچون هندگه جونه تیلردی.

پاکستان حربی لری گه کوره هندافغان عسکرلرینی پاکستانگه قرشی تعلیم بیره دی.

کرزی جنابلری اوتمیشده هم پاکستان ایشانچینی کسب ایتیش اوچون بار- باربومملکتگه سفرقیلگنینی تیلگه آلگندی.

اما اونینگ بوخصوصده گی سعی وحرکت لری نتیجه سیز ایدی.

کرزی جنابلری افغانستان حکومتی نینگ حاضرگی پاکستانگه نسبتن آلدینگه قویگن سیاستی نی توغریدن توغری تنقیدله گن.

سابق افغانستان جمهور رئیسی اوتکزیلگن اوشبو صحبتده اشرف غنی حکومتی گه قرشی سیاسی اتفاق توزیش اوچون سعی وحرکت قیله یاتگنی باره سیده گی میش-میش لرنی رد ایتگن.

او محمد اشرف غنی حکومتی دن حمایت ایتیشینی بیلدیریب لازم بولگنده مصلحت هم بیریب کیله یاتگنینی تاکیدله دی.