میلادی 5 عصرده قوریلگن کابل قلعه سی، نابود بولیش عرفه سیده

Image caption بو تآریخی قلعه حاضر یامان وضعیتده، یقیلیب توشیشی احتمالی موجود.

افغانستان حکومتی، مملکت حاضرگی کونده قریب بیر مینگ و ایکی یوز تاریخی بنا نابود بولیش عرفه سیده بولیب، دولت اولرنی اسره ب قالیشده ییترلی بودجه گه ایگه ایمسلیگی نی ایتگن. بو بنالردن اکثریتی اوتگن اوچ دهه اوروشلر جریانیده ویران بولگن.

قدیمیلیگی میلادی بیشینچی عصرگه ییته دیگن کابل بالاحصار قلعه سی بو بنالر جمله سیدن. حاضربو قلعه بیر حربی قرارگاه گه ایلنگن و اونی لازم درجه ده اسره ش عملگه آشیریلمه یدی.

افغانستان آبده شناسلریدن بیری بولگن میراحمد جوینده نینگ ایتیشیچه، بو قلعه نینگ قدیمیلیگی اسلام دن آلدین گه توره دی. بو قلعه کابل شهری نینگ جنوب شرقی قسمیده گی تاغ اوستیده جایلشگن.

جوینده جنابلریگه کوره، بو قلعه کابل شهری اهالیسی بودا مذهبی نی پیرولیک قیله یاتگنلریده، قوریلگن.

اونینگ ایتیشیچه، کابل نینگ بو منطقه سی بودایی لرنینگ مهم منطقه لردن بولگن. مثال قیلیب ایتگنده، تیپه مرجان ده بودایی لرنینگ اینگ کته عبادتگاهی کشف ایتیلگن.

کابل پادشاه لری تورلی خیل دورلرده بالاحصارده دبه دبه لی حیات کیچیرگنلر. اما حاضر تاش و آجردن قوریلگن ویرانه لر قالگن خلاص.

Image caption کابل پادشاه لری تورلی خیل دورلرده بالاحصارده دبه دبه لی حیات کیچیرگنلر.

بو قلعه باشله نیشده حربی مقصدلر اوچون قوریلگن، اما زمان اوتیشی بیلن تاریخی اهمیت نی کسب ایتگن. لیکن حربی جهتده فایده لنیش حاللری هیچ قچان هم اوزگرمه گن. حاضر هم ملی اردونینگ 120 عسکردن عبارت بولگن بیر حربی قسمی بو قلعه ده جایلشگن.

بالاحصار قلعه سی استراتیژیک و تاریخی اهمیتی سبب بیر ارزشلی مکان حسابلنه دی. بو بنا اوتمیشلرده قانلی جنگلرگه گواه بولگن. افغان ـ انگلیس اوروشلریده کیینچه لیک کمونیستی حکومتلر دوریده بو قلعه دن بیر حربی مهم مرکز صفتیده فایده لنگن.حتی مجاهدلرنینگ عصیانلریدن بیری کمونیستی حکومتگه قرشی شو قلعه دن باشلنگن اونی ایسه بالاحصار قیامی دییشه دی.

سونگی ییللر ده هم ناتو کوچلر بو قلعه گه جایلشگندی. اینگ سونگی بار ینگی بیر عصرآلدین سابق پادشاه نادرشاه نینگ فرمانی بیلن قیته قوریلدی و کمونیستی حکومت دوریدن سونگ، اونینگ ایریم قسملریده یانغین یوزبیریب ویران بولدی.

مجاهدلر حاکمیت گه ایریشگندن سونگ، بو قلعه ایچکی گروه لر اورته سیده یوز بیرگن اوروشلرده قتیق ضررلندی و اوشه وقتدن بویان ویران حالیگه تورگن.

Image caption بو قلعه باشله نیشده حربی مقصدلر اوچون قوریلگن، اما زمان اوتیشی بیلن تاریخی اهمیت نی کسب ایتگن.

افغانستان اخبارات ومدنیت وزیرلیگی معاونی مصدق خلیلی، مذکور قلعه بوندن بیر ییل آلدین ملی مدافعه وزیرلیگیدن اخبارات و مدنیت وزیرلیگیگه تاپشیریلگنی نی ایته دی. اما دولت اونی قیته قوریشده ییترلی امکانیت گه ایگه ایمس دییدی. او جمهور رییس غنی بو مسله گه اعتبار قره تیشیگه امیدوار.