ایریم مسجدامام لری فرخنده قتلینی قاره له دیلر

افغانستانده گی بیرقطار مسجد امام لری جمعه نمازی خطبه سیده فرخنده نینگ اولدیریلیب وکویدیریلگنینی قاره لب ودولت دن اونینگ قتلی گه عامل بولگن لرجزاله نیشی سوره دیلر. اوتگن ییلی 28حوت غضبلنگن کیشی لرنینگ ادعا قیلیشیچه فرخنده نی قرآن کریمنی یاققن لیگی سبب اونی کابل شهریده کلتکلب وتاشلب اولدیردیلروکیین جسدینی یاقیب یوباردیلر. اما گواه لرگه کوره فرخنده تعویذبیره دیگن لردن بیری بیلن جنجلی چیققنی سبب او اونی قرآن کریم نی یاققن لیککه عیبله گن. بامیان ولایتی جامع مسجدی امامی غلام رضا رضوانی فرخنده نینگ قتل ایتیلیشی نی انسانیت گه ضدعملی دیب وعامللری جزاگه تارتیلیشی نی سوره دی. رضوانی جنابلری بیرار کیشی قرآنگه حرمت سیزلیک قیلگن تقدیرده بوکتابده اهالی اونی اولدیرسین دیب بویروغ بیریلمه گنینی تیلگه آلیشدی. جلال آباد شهریده مسجد امام لری هم فرخنده نینگ قتل ایتیلیشی نی قاره لب وتعویذ بیره دیگن ومسجد قوریقچی لریدن تنقید قیلگن. حالبوکی فرخنده قتل ایتیلیشیدن بیرکون اوتیشی بیلن کابلده گی مسجد امام لریدن محمد ایازی نیازی مسجدده اوتکزگن خطبه ده غضبلنگن اهالی عملینی حمایه قیلیب گپیرگندی. بونینگ آرتیدن نیازی جنابلری اوز فیس بوک صحیفه سیده اونینگ بوباره ده بیلدیریگن مناسبت لری خبرنگارلر تاماندن باشقه چه قیلیب ییتکزیلگنینی ایتگندی. اونینگ بوباره ده بیلدیرگن مناسبتی اجتماعی ترماق لر ومدنی جماعه چیلیک اعضالرینی غضب لریگه سبب بولیب وحکومت دن اونی وظیفه سیدن آلنیشینی طلب قیلگندیلر. بیراق نیازی نینگ طرفدارلری تنقید قیلگن لرنی دین قرشی لری دیب عیبله ماقده لر. اوتگن کون کابلده یوزلب علمالر فرخنده قتلی گه تیگیشلی رسانه لرومدنی جماعه چیلیک قیلمیش لریگه اعتراض بیلدیریب شاه دوشمشیره زیارتگاهی یقنیده توپلنگندیلر. شاه دوشمشیره مسجدی امامی علمالرگه حقارت قیلینگن دیب اعتراض بیلدیریب اوز وظیفه سیدن استعفاگه چیقدی. فرخنده قتلی دن کیین مدنی جماعه فعاللری، انسان حقوق فعاللری، عیال حقوق فعاللری ویوزلب نفر فرخنده نینگ قتلی نی قاره لب وبوحادثه تیکشیریلیشی اوچون کوچه لرگه چیققندیلر.