شولگره ـ دره صوف یولیده اوچ نفر یولاوچی اوغیرلنگن

بو اوچ نفر اوتگن کونی سمنگان ولایتی دره صوف تومنی دن مزارشریف تمان کیله یاتگن بیر چاغده، بلخ ولایتی شولگره تومنی یولی آقمیده ناتنیش قوراللی شخصلر تمانیدن اوغیرلنگن. اوغیرلنگن لرقه ییرده لیگی وانیق کیم تاماندن نیمه مقصد بیلن آلیب کیتیلگنی معلوم ایمس. بلخ امنیه قوماندانلیگی سرپرستی عبدالرزاق قادری نینگ بی بی سی گه ایتیشیچه، مذکور شخصلردن بیری تاش کومیر تاجری بولگن واولر قنده ی گروه لر تمانیدن اوغیرلنگنی هنوز معلوم ایمس. او اوغیرلنگن شخصلرنی آزاد ایتیش اوچون عملیات باشلنگنیدن خبر بیردی. اما بلخ ولایتی شولگره تومنی حاکمی سراج الدین عابد، اوغیرلنگن شخصلر بیش نفر تینچ اهالی بولیب، شولگره ـ دره صوف قتناو یولیده ناتنیش قوراللی شخصلر تمانیدن آلیب کیتیلگنینی ایتگن. ایتیلیشیچه، یولاوچیلرنی اوغیرله گن قوراللی شخصلر محلی پولیس کییمیده بولگن. عین حالده، مزارشریف شهریده اوتگن کونی افغانستان تشقی ایشلروزیرلیگی نینگ شمالده گی ملاقات اداره سی مسوولی عزیزاحمد ناتنیش قوراللی شخصلر تمانیدن آتیب اولدیریلدی. پولیس هنوزگچه بو حادثه ده بیرارته نی عیبلب قولگه آلمه گن و قتل حادثه سببلری هم انیقلنمه گن. بلخ ولاتیده قتل و آدم اوغیرلش حاللری اوتگن ییلده کوپ صادر ایتیلگنی ایتیله دی. سونگی ایچکی ایشلر وزیرلیگی بیر قطار ولایتلرده آدم اوغیرلش حاللری آلدی آلینیشی اوچون مخصوص کمیسیون ایجاد ایتگن. بوندن بیر آی آلدین غزنی ده اوغیرلنگن 31 یولاوچی نینگ تقدیری حقیده هنوزگچه هیچ قنده ی معلومات موجود ایمس. دولت هم اوغیرلنگنلرنی آزاد ایتیش اوچون جدی چاره کوریب چیقمه گن.