سعودی عربستانی 100 مینگ افغانستانلیکنی ایشگه قبول قیله دی

سعودی عربستانی 100 مینگ افغانستانلیک کارگرنی ایشگه قبول قیلیشی ممکنلیگی نی ایتگن.

بو مطلب نی شمالی مزارشریف گه سفر قیلگن سعودی عربستانی بیر هیاتی، بلخ حاکمی بیلن اوتکزگن اوچره شوویده تیلگه آلگن.

بلخ ولایتی گه سفر قیلگن سعودی عربستانی دولتی نینگ اجتماعی ایشلروزیرلیگی مستشاری شیخ سعود الطنین، اوز مملکتیگه 100 مینگ افغانستان لیک نی ویزه بیلن ایشگه قبول قیلیشی ممکنلیگی نی ایتگن.

بلخ اجتماعی ایشلر اداره سی رییسی گلالی هوتک نینگ بی بی سی گه ایتیشیچه، سعودی عربستانی بو هیاتی بلخ حاکمی و بیرقطار محلی اداره لر مسووللری بیلن اوتگزکن اوچره شوویده بو مطلب نی تیلگه آلگن.

سعودی عربستان مستشاری تیز آره ده افغانستان و سعودی عربستانی اورته سیده بیر کیلیشوونامه امضاله نیب، اونینگ اساسیده، مملکتی افغانستان نینگ مهارت گه ایگه بولگن یوز مینگ آدمینی ویزه بیلن ایشگه قبول قیلیشی ممکنلیگی نی تاکیدله گن.

بلخ ولایتی حاکمیت اداره سی مطبوعات خذمتی تمانیدن نشر ایتیلگن خبرنامه گه کوره، افغانستان اجتماعی ایشلر وزیرلیگی معاونی بیلن بو شهرگه سفر قیلگن سعودی عربستانی هیاتی، بلخ حاکمی بیلن تورلی مسله لر جمله ده اقتصاد، سیاست و مدنیت مسله لری باره سیده بحث قیلیب، بلخ ولایتیده عملگه آشیریلگن رواجلنیش ایشلرنی آلقیشله گن.

بلخ ولایتی حاکمی سعودی عربستانی نینگ افغانستان مرکزی حکومتی و خلقی نی حمایه قیله یاتگنی دن منتدارچیلیک بیلدیرگن. عین حالده، شیخ سعود الطنین بلخ ولایتی نی آبادانلشتیریش لایحه لرنی طبیق ایتیش اوچون اساسی مرکز ایکنینی تاکیدلب، مزارشریف گه قیلگن سفریدن اساسی مقصد، افغانستان وضعیتی نی کوزه تیش و ایکله مملکت مناسبتلری باره سیده محل مسووللر بیلن اوچره شوودن عبارت ایکنی نی ایتگن. بو اوچره شووده، افغانستان اجتماعی ایشلر وزیرلیگی معاونی حسام الدین همراه، مملکتده 60 فایز ملکه لی یاشلر ایش سیز ایکنی نی ایتیب، مملکت ده ایش سیزلیک میزانی آشیب باره یاتگنی دن تشویش بیلدیرگن. افغانستان اجتماعی ایشلروزیرلیگی معاونی گه کوره، سعودی عربستانی 100 مینگ افغانستانلیک نی ایشگه قبول قیلگن حالده، مملکت ده ایش سیزلیک میزانی بیر آز کمه ییشی ممکن.

ایتیلیشیچه، سعودی عربستانی نینگ بو هیاتی بلخ ولایتی تآسیساتلری، کارخانه و بلخ بیلیم یورتی نی هم کوریب چیقیب، بو ولایت ده ایش وضعیتی نی یقین دن تیکشیرگن.