اولوسی جرگه کیله سی ییغینیده تکلیف ایتیلگن وزیرلرگه آواز صندوقلرینی قویه دی

اولوسی نینگ بوگونگی ییغینیده معارف؛ عیاللر، فواید عامه و ترانسپورت وزیرلیکلری اوچون تکلیف ایتیلگن نامزد وزیرلر اوز برنامه لرینی تقدیم ایتگنلر. معارف وزیرلیگی اوچون نامزد اسدالله حنیفی بلخی، معارف وزیرلیگی اداری فسادگه چلینیب، تشکیلات نقط ی نظردن هم مشکل گه دچار بولیب، اصلاحات گه احتیاج بارلیگی نی تاکیدله گن. بلخی جنابلری اداره لرده مناسب و ملکه لی کدرلرنی تعیینلش بیلن اداری فساد گه قرشی کوره شینی ایتگن. او تعلیمی نصاب یخشیلنیشی و تحصیل نی بیتیریب چیقنلر اوچون ایش زمینه سی مهیا قیلینیشی نی تاکیدله گن. عیاللر وزیرلیگی افغانستان کابینه سیده عیاللر وزیرلیگی اوچون تکلیف ایتیلگن دلبرجان نظری، ملی مقیاسده عیاللر معمالرینی حل ایتیش و اولرنینگ ظرفیتلرینی آشیریش اوچون کینگ قمراولی برنامه لرنی یولگه قوییش و عیاللرگه قرشی زوره وانلیکلرگه قرشی مهم لایحه لرنی قولگه آلیشی نی ایتگن. خانم نظری نینگ ایتیشیچه، او عیاللر وزیرلیگی نی فنی لشتیریش اوچون ملکه لی کدرلرنی تعیینلب، اداری ایشلری گه جدی اعتبار بیریشگه حرکت قیلیب، عیاللر وزیرلیگی چوکاتیده جنسیت رهبرلیگی اوچون ملی کمیت ایجاد ایتیشینی تاکیدله گن. فوائد عامه وزیرلیگی اولوسی جرگه نینگ ییغینی بیر بولیمیده فواید عامه اوچون تکلیف ایتیلگن نامزد وزیر محمد بلیغ، اوزاق مدت، اورته مدت و قیسقه مدت ده اداره لرده گی فساد نی یوق ایتیش اوچون اصلاحات کیلتیریشی ممکنلیگی نی ایتگن. اونگه کوره، شهرلرنی اسره لش و مراقبت قیلیش اوچون برنامه لر ایجاد ایتیش، ولایتلر و قیشلاغلراورته سیده جاده لرنی وجودگه کیلتیریش توغریسیده لایحه لرنی ایشگه سالیشی ممکنلیگی نی تاکیدله گن. او بو برنامه لرنی دنیا بانکی، اسلامی ترقیات بانکی، آسیا ترقیات بانکی و امریکا خلق ارا ترقیات اداره سی نینگ یاردمی بیلن عملگه آشیریشی کیره کلیگی نی ایتگن. ترانسپورت و هوا یوللری وزیرلیگی نامزدی بو ییغین نینگ سونگی ده ترانسپورت و هوا یوللری وزیرلیگی اوچون نامزد محمدالله بتاش، ییر وهوا یوللری اوچون معیاری خذمتلر، ترانسپورت قوله یلیکلر و ایش زمینه سی همده اقتصادی ترقیات اوچون بیرینچی اورینلی ایشلرنی عملی قیلیش لایحه لرنی یولگه قویشی نی وعده قیلگن. بتاش جنابلری شونینگ دیک، افغانستان نینگ حاضرگی ترانسپورت وضعیتی نی یامان توصیفلب، شفافیت ایجاد ایتیلیشی اوچون 1358 ییلده گی ترانسپورت قانونی ایشگه سالینیشی کیره کلیگی نی تاکیدله گن. اوشونینگ دیک، ترانسپورت سالیقلری نی تولش بولیمیده شفافیت تامینلنیشی خصوصیده اعتبار بیریشی نی ایتیب، شهر وهوا یوللری ترانسپورتی رواجلنیشی و هوا شناسلیک اداره سی کوچه یتیریلیشی خصوصیده برنامه لر تطبیق ایتیلیشی نی معلوم قیلگن. نامزد وزیرلرنینگ برنامه لرینی تقدیم ایتیش جریانی نماینده لرنینگ سواللریگه دوچ کیلمه ی یکونلندی. حاضرگه قدر افغانستان کابینه سی نینگ 9 اعضاسی اولوسی جرگه نماینده لریدن ایشانچ آواز قولگه کیریتگن و افغانستان حکومتی نینگ کابینه سی بوندن ییتی آی دن بیری تکمیل بولمه گن.