مدافعه وزیرلیگی: 13 ولایت ده حربی عملیات دوام ایتماقده

Image copyright MoD

افغان امنیتی مقاملری شمال شرقی قندوز ولایتی داخل 13 ولایتده ییگیرمه بیر حربی عملیات دوا م ایتیب کیله یاتگنیدن خبربیردی، مقاملرگه کوره، بوعملیات لرنتیجه سیده 77 قوراللی هلاک بولگن.

شونینگ دیک 66 عصیانچی هم بو عملیات لرجریانیده یاره لنگن.

افغانستان مدافعه وایچکی ایشلر وزیرلیکلری نینگ سوزلاوچیلری کابلده اوتکزگن قوشمه مطبوعات انجمنیده اون اوچ ولایت ده حربی عملیات دوام ایتیب کیله یاتگنی باره سیده معلومات بیردی، لیکن بو ایککی مقام صحبت لری نینگ کوپ قسمی قندوز وضعیتیگه قره تیلگن ایدی.

مدافعه وزیرلیگی سوزلاوچیسی دولت وزیری عصیانچیلرنی یوق ایتیش اوچون بو ولایت ده ایترلیچه کوچ موجود لیگیینی ایتیب بوحقده شوندی دیدی :"حربی عملیات دوام ایتیب کیله یاتگن محللرده بیزنینگ قولیمیز بلند، قوراللی عصیانچیلر آغیر تلفات کورگن، قندوز مردمی اره سیده پیدا بولگن تشویشلردیک بیزنینگ تشویشمیز یوق ، قندوزده حربی عملیات دوام ایتماقده. نه قندوز، ونه هم قیسی بیر تومن وحتی بیرقیشلاق هم طالبان نظارتیگه اوتمیدی."

وزیری جنابلری افغانستان بویلب دوام ایتیب کیله یاتگنی 21حربی عملیات ده 77 عصیانچی هلاک و 66 قوراللی هم یاره لنگنینی ایتدی. اما قندوزده گی قتیق توقنه شوولر تلفاتی باره سیده انیق رقم بیرمه دی.

بوندن ایکی کون مقدم قندوز حاکمی قرق دن ارتیق عصیانچی و سکیز افغان عسکری هلاک بولگنینی معلوم قیلگن ایدی.

افغانستان ایچکی ایشلر وزیلیگی سوزلاوچیسی صدیق صدیقی قندوز ولایتیده گی اوروش یخشی رهبرلیک بوله یاتگنینی تیلگه آلیب، افغان امنیتی کوچلر بیلن اوروشیب کیله یاتگن عصیانچیلرنینگ کوپینچه سی تشقری و باشقه حدودلردن بولایت گه کیلگنینی ایتدی:"بوعصیانچیلر ینگیدن وزیرستان لردن کیلگن، نه فقط شمالی وجنوبی وزیرستان بلکه بدخشان و فاریاب ولایت لریدن هم قوراللی جنگره لربولایت گه کیلگن وافغان امنیتی کوچلری بیلن اوروشیب کیلماقده، نهایت دشمن تلفات کوره دی اولرنینگ تلفاتی بیزنینگ تلفاتی میزگه قره گنده نیچه برابر."

مقاملرنینگ ایتیشلریچه، شمال شرقی بدخشان ولایتی نینگ وردوچ و جرم تومنلریده هم عملیات لر دوام ایتماقده، مدافعه وزیرلیگی سوزلاچیسی اکثر حدودلر طالبان دن تازلنگنینی اورغولب تاجیکستانلیک بیر عصیانچی هم بوگون قولگه آلینگنیدن خبربیردی.

عینی حالده مدافعه وزیرلیگی غزنی و زابل ولایتلریده یولگه قوییلگن "بدر"ناملی عملیات جریانیده غزنی ولایتی نینگ مقر، گیلان وزابل نینگ شاه جوی تومنی طالبان عصیانچیلردن تازه لنگنینی ایتدی.

باشقه بیر خبرگه کوره ، تخار ولایتی نینگ خواجه غار تومنیده طالبان و افغان امنیتی کوچلری اره سیده یوزبیرگن توقنه شووده کمیده 5 طالب هلاک ینه 7 طالب یاره نگن.