ییگیرمه کیشی لیک هیات طالبان بیلن مذاکره قیلیش اوچون قطرگه سفر قیلگن

افغانستان رسمیلری نینگ ایتیشیچه، بو مملکت تمانیدن 20 کیشی لیک هییت طالبان نماینده لری بیلن مذاکره قیلیش مقصدیده قطرگه سفر قیلگن. بو هییت اعضالری تینچلیک عالی کینگشی و مستقل سیاسی سیمالردن عبارت ایکنی ایتیله دی.

رویترز خبر آژانسی نینگ افغانستان تینچلیک عالی کینگشی معاونی عطاالله لودین نینگ تیلیدن یازیشیچه، بو هییت کیله سی هفته نینگ یکشنبه و دوشنبه کونلریده طالبان نینگ باشلنغیچ مذاکره لریده اشتراک ایتیشی ممکن.

لودین جنلریگه کوره، بو مذاکره لر افغانستانده گی صلح مسله لریگه عاید بولیب، اونده افغانستان، پاکستان و طالبان گروهی باشقه بیرقطار اداره لراشتراک ایته دی.

او شونینگ دیک، افغانستان تینچلیک عالی کینگشی اعضالری قطرده گلبیدین حکمتیار رهبرلیگی ده گی افغانستان اسلامی حزبی نینگ ایکی نماینده سی بیلن هم دیدارلشی ممکنلیگی نی معلوم قیلگن.

حکمتیار رهبرلیگی ده گی اسلامی حزب افغانستان دولتی و خارجی کوچلر گه قرشی جنگ قیله یاتگن گروه لردن بیری دیر.

اما افغانستان تینچلیک عالی کینگشی سرپرستی عبدالحمید مجاهدنینگ بی بی سیگه ایتیشیچه، بو هییت ترکیبیده کینگش نینگ 8 اعضاسی هم موجود بولیب، اولر دوحه ده گی مذاکره لرده افغانستان دولتی تمانیدن رسمی نماینده صفتیده اشتراک ایتمسلیگی ممکن.

مجاهدجنابلریگه کوره، بو کنفرانس بیرلشگن ملتلر تشکیلاتی اداره لریدن بیری نینگ تدبیری بیلن اوتکزیلیشی و اونده طالبان بیر قطار نماینده لری هم اشتراک ایتیشی ممکن.

عین حالده، مجاهد جنابلری افغانستان ده صلح تامینلنیشی باره سیده هر قنده ی ییغینده طالبان نماینده لری حضور تاپیشی، صلح نینگ فایده سی ایکنی نی ایتگن.

طالبان گروهی یوقاری نماینده لریدن بیری هم کیله سی هفته لرده اولر و پاکستان نماینده لری اورته سیده گی مذاکره لرده اسلامی حزب نینگ نماینده سی هم حضور تاپیشی ممکنلیگی نی تصدیقله گن.

طالبان گروهی بوندن ایکی ییل آلدین، اوزی نینگ نماینده لیگی نی قطرنینگ پایتختی دوحه ده آچیب، اونده افغانستان اسلامی امارت بیره غینی کوتردی. بو مسله افغانستان دولتی نینگ قتیق اعتراضیگه سبب بولدی.