جوزجان ده اوتکزیلگن عملیاتده 7 قورالی مخالف نابود قیلینگن

جوزجان ولایتی خوفسیزلیک مسووللری ولایت نینگ ایریم منطقه لرینی طالبان تصرفیدن تازه لش عملیاتی باشلنگنی دن خبر بیریشگن.

بوندن ایکی کون آلدین باشلنگن حربی عملیاتده جوزجان مردیان تومنی نینگ بیر نیچه قیشلاقلری مخالفلر نظارتیدن تازه لنگن. جوزجان پولیس اداره سی مسووللری نینگ بی بی سیگه ایتیشیچه، خوفسیزلیک کوچلری آقچه تومنی قیشلاقلریگه عملیات اویوشتیریب، نتیجه ده 7 نفر طالبان نی نابود قیلگن. اولگنلر آره سیده خارجی جنگریلر بارلیگی ایتیلگن. مذکور عملیات ده بیر پولیس و بیر ملی اردو عسکری یره لنگنی خبر قیلینگن.

جوزجان ولایتی پولیس اداره سی قوماندانی فقیر محمد جوزجانی نینگ بی بی سیگه ایتیشیچه، شنبه کوندن بیری ولایت نینگ مردیان و آقچه تومنلری نینگ بیر قطار قیشلاقلرینی قوراللی مخالفلر تصرفیدن تازه لش اوچون کینگ حربی عملیات باشلنگن.

او بو عملیات عاقبتیده قوراللی مخالفلرگه کته تلفات یتکزیلگنلیگی و اونلب قیشلاق اولرنینگ تصرفیدن تازه لنگنی نی ایته دی.

اونگه کوره، هلاک ایتیلگن مخالفلر آره سیده ایکی پاکستانلیک جنگری هم موجود بولگن.

جوزجانی نینگ معلوم قیلیشیچه، بو عملیات ده بیر ملی اردوسی عسکری هلاک بولگن وباشقه تورت پولیس یره لنگن.

اوشونینگ دیک، مذکور عملیات ده عادی اهالی گه هم ضرر ییتگنینی معلوم قیلدی.

عین حالده اوزینی طالبان گروهی سوزچیسی دیب تنیشتیره یاتگن ذبیح الله مجاهد، بو عملیاتده دولت خوفسیزلیک کوچلریگه آغیر تلفات ییتکزیلگنینی ادعا قیلگن.

اما بو ادعا جوزجان خوفسیزلیک مسووللری تمانیدن رد ایتیلگن.

جوزجان پولیس قوماندانی عملیات ولایت قوراللی مخالفلر وجودیدن تازه لنگونچه دوام ایتدیریلیشی ممکنلیگی نی تاکیدله ماقده.