کابلده گی مهمانخانه لردن بیریگه اویوشتیریلگن هجومده کمیده14 نفرهلاک بولگن

Image copyright AFP

بیرلشگن ملتلر تشکیلاتی نینگ افغانستانده گی وکالت خانه سی ، اوتگن کیچه کابل ده گی پارک پلس مهمانخانه سیگه قرشی اویوشتیریلگن هجومده توقیز چیت ایللیک داخل اون تورت نفر هلاک ایتیلگنیدن خبربیرگن.

شونینگ دیک بو اداره تمانیدن ترقه تیلگن خبرنامه ده هجوم قتیق قاره لنگن.

بیرلشگن ملتلر تشکیلاتی نینگ انسان حقلری جمغرمه سی نینگ کابلده گی مسوولی کونی کیچه یوزبیرگن هجوم دن مقصد " قصدی شکلده عادی اهالی نی اولدیریش دیه بهاله گن.

هجوم محلی وقت بیلن کیچه ساعت سککیز یریم اطرافیده باشلنیب بیش ساعت توقنه شوودن سونگ یکون تاپگن

بوندن الدین راق کابل پلیس اداره سی نینگ جنای وتحقیقات بوییچه مسوولی فرید افضلی بی بی سی بیلن بولگن صحبتیده اوتگن کیچه یوزبیرگن هجومده اون بیر نفر هلاک بولگنینی ایتدی

اما کابل پلیس باشلیغی هلاک ویاره لنگنلر سانی اون نفر دن کوپ ایمسلیگینی اورغولب هجومچی هم بیرکیشی بولگنینی ایتگن.

امریکا نینگ کابل ده گی ایلچیخانه سی پارک پلس مهمانخانه سی گه قرشی اویوشتیریلگن هجومده بیر امریکالیک هلاک بولگنینی تصدیق له گن.

هندوستان نینگ افغانستانده گی ایلچیخانه سی مسووللری هلاک بولگنلر اره سیده تورت هندوستانلیک هم بارلیگیدن خبربیرگن، مسووللرگه کوره، اولردن بیری عیال بولگن.

هندوستان ایلچیسی آمر سینها تویتیر صحیفه سیده هجوم یوزبیرگن محلده ایریم هندوستانلیک لر بارلیگینی ایتیب اولردن بعضی لری قوتقریلیب وبیرتعدادی هم هلاک ایتیلگنینی ایتگن.

Image copyright AP

هندوستان باش وزیری نارندرا مودی جمهوررییس اشرف غنی بیلن تیلفونی علاقه قوریب اوتگن کیچه یوزبیرگن قانلی حادثه اوچون تاسف بیلدیرگن.

مودی جنابلری تویتر صحیفه سیده شوندی یازگن:" تروریزم مساله سی اورته گه چیقق ده افغانستان وهند بیرمیز، جمهوررییس غنی هندوستان وطنداشلری نینگ بوهجومده هلاک ایتیلگنیدن تاسف بیلدیردی."

طالبان گروهی هجوم مسوولیتی نی اوز ذمه سیگه آلیب مهمانخانه ده گی کوپ مهمانلر اولدیریلگنینی ادعا قیلگن.

همده، طالبا گروهی هجومچی بیرکیشی بولگنینی ایتگن.

اوز اسمینی ایتیشینی ایسته مه گن امنیتی مقاملردن بیری هجوم باشلنگندن سونگ فرانسه خبرآژانسی بیلن بولگن صحبتیده شوندی دیگن:" بومهمانخانه ده کنسرت اوتکزیلیشی ریجه لشتیریلگن ایدی، کنسرت ده دعوت بولگن مهمانلراکثریتی نی ترکیه لیک وهندوستانلیک لر تشکیل بیررایدی."

هجوم گه توتیلگن مهمانخانه ایچکی ایشلر وزیرلیگی بناسیدن قریب بیرکیلومتر اوزاق لیکده جایلشگن شونینگ دیک بو مهمانخانه یقینیده هالند ایلچیخانه سی وایریم مهمانخانه لر، همده مهم اداره لرجایلشگن.