آقچه دن اوچ مینگ دن آرتیق عایله اوی ـ جایلرینی ترک ایتیشگن

آقچه تومنیگه تورت یوزگه یقین جنگری اطراف ولایتلردن باریب جایلشگن. اولر محل اهالیسینی دولت کوچلریگه قرشی اوروش باشلشلری باره سیده آگاه لنتیریب، اوی جایلرینی ترک ایتیشگه مجبورله گنلر.

بو جنگریلر آره سیده بیرتعداد پاکستانلیک تیروریستلر بارلیگی ایتیلگن.

آقچه تومنی حاکمی رحمت الله حشرنینگ بی بی سیگه ایتیشیچه، مذکور جنگریلر اوز تصرفیده گی اونگه یقین قیشلاق اهالیسینی دولت خوفسیزلیک کوچلریگه قرشی جنگ باشلشلری باره سیده آگاه لنیتریب، اوی جایلرینی ترک ایتیشگه مجبورله گن.

شو تهدیدلر سبب 3 مینگ دن آرتیق عایله اوز اوی جایلرینی ترک ایتیشگن.

حشر جنابلریگه کوره، آواره لر باش پنه، آذیق آوقت و ایچیملیک سوو تنقیصلیگی گه روپه ره.

آقچه حاکمی نینگ معلوم قیلیشیچه، تومن نینگ اونگه یقین قیشلاغی مخالفلرنینگ تصرفیده. اولر محلی اهالیسی نی مرکزی دولت گه قرشی توریشگه اونده ب، دینی تبلغلرینی مردم آره سیده کینگه یتیرگن.

حاکم شونینگ دیک، مخالفلرنینگ تهدیدی و فعالیت لری سبب، بیر تعداد مکتبلرنینگ یاپیلیب قالیشی و تعلیم جریانی سسته ییشیگه سبب بولگنینی ایتگن.

حشرجنابلری، آقچه ده گی مخالفلرنی نابود قیلیش اوچون خوفسیزلیک کوچلری عملیات باشلشگه تیارگرلیک آلگن. اما مخالفلرنینگ زمانوی قورال اسلحه لربیلن جهازلنگنی و تینچ اهالی گه تلفات ییتکزیلمسلیگی اوچون عملیات نی دقت بیلن باشلش کیره کلیگی نی تاکیدله گن.

او مرکزی دولت آقچه ده گی وضعیت گه جدی اعتبار قره تمه گن تقدیرده، قوراللی مخالفلرنینگ فعالیتی کینگه ییب، شمالی ولایت لرنی بیر ـ بیراولری نی باغله یدیگن قتناو یوللری نینگ باردی کیلدی جریانینی کیسیشی ممکنلیگی باره سیده آگاه لنتیرگن.

اونگه کوره، مخالفلر آقچه نینگ قتناو یوللری ده ایلیک دن آرتیق ماین اورنتگن. اما خوفسیزلیک کوچلری بو ماینلردن بیر تعدادی نی ایشدن بوشه تیشگن.

عین حالده، جوزجان امنیه قوماندانی فقیرمحمد جوزجانی آقچه ده وضعیت یخشی ایکنینی ایتیب، بیر تعداد عایله لر مخالفلرنینگ آزار ـ اذیت لری سبب اوی جایلرینی ترک ایتگنلیگی نی تصدیقله گن.

بوندن بیر هفته آلدین ملی پولیس وملی اردو کوچلری آقچه تومنی بیر تعداد قیشلاقلریده حربی عملیات اوتکزیب، اونگه یقین قوراللی مخالفلر نابود قیلینگندی. شونگه قره مسدن، قوراللی مخالفلرنینگ فعالیتی کون سیین آشیب باره یاتگنی اهالی حیاتیگه جدی تاثیرسالگن.