Dunyo, yangiliklar: Ikkiga bo'lingan Istanbul va rossiyaliklar qashshoqligiga ishonmagan Kreml

AKP Istanbul bo'ylab "g'alaba e'lonlari"ni osib chiqdi

Фото муаллифлик ҳуқуқи EPA

Kundalik o'tayotgan matbuot konferensiyalarida muxolifatdagi Jumhuriyat Xalq Partiyasi (CHP) nomzodi Ekrem Imomo'g'lu o'zini Istanbulning yangi meri sifatida tanishtirmoqda. E'lon qilingan dastlabki natijalar ham uning o'tgan hafta bo'lib o'tgan mahalliy saylovlarda g'olib chiqqanini ko'rsatgan. Biroq, ayni vaqtda, Istanbul ko'chalaridan prezident Rajab Tayyip Erdog'on va AKP (Adolat va Taraqqiyot Partiyasi) nomzodi Binali Yildirimning birgalikda g'alaba uchun Istanbulga tashakkur izhor qilayotgani tasvirlangan plakatlar paydo bo'lgan. Hukumatning Istanbul bo'yicha natijalarni qayta hisoblab chiqishga ko'rsatma bergani xabar qilinadi.

Bi-bi-si bilan suhbatda janob Imomo'g'lu shu kunga qadar hukumat va qudratdagi partiyaning Turkiyada eng ishonchli saylov tizimi mavjudligini iddao qilib kelgani, ammo hozirda o'z xatolarini oqlash uchun bahonalar qidirish bilan ovora ekanini ta'kidlagan.

31-mart kuni bo'lib o'tgan mahalliy saylovlar prezident Erdog'on uchun sinov o'laroq ko'rilgan edi. AKP umumiy hisobda peshqadam bo'lgan esada, muxolifat Anqara, Istanbul va Izmir kabi muhim shaharlarda nazoratni qo'lga olishga muvaffaq bo'lgan.

Kraystcho'rch fojiasi ortidan Avstraliya texnologiya kompaniyalarini nishonga olmoqda

Фото муаллифлик ҳуқуқи Getty Images

Avstraliyada o'z platformalarida zo'ravon videolar qo'yilishiga yo'l bergan texnologiya kompaniyalarni jazoga tortish va ularning rahbarlarini ozodlikdan mahrum etishni ko'zda tutuvchi qonunlar qabul qilindi. Mazmuni bo'yicha dunyoda birinchi ekani aytilayotgan ushbu qonunlar o'tgan oyda Yangi Zelandiyadagi masjidlarda 50 nafar insonning umriga zomin bo'lgan hujum ortidan chiqmoqda. O'shanda hujumni uyushtirgan shaxs jarayonni jonli uzatib turgan.

Shuningdek, qonunlar "nafrat uyg'otuvchi material"ni zudlik bilan o'chirib tashlamagan texnologiya kompaniyalarini ham jazoga tortishni ko'zlaydi. Yangi qonunlarga ko'ra, terror hujumlari, qotilliklar, zo'rlash, qiynoqqa solish va odam o'g'irlash kabi holatlar tasvirlangan videolar "nafrat uyg'otuvchi material" sifatida baholanadi. Belgilangan tartibni bajarmagan kompaniyalarni $7,5 millionga qadar jarima yoki yillik pul aylanmasining 10 foizini olib qo'yish, ularning rahbarlarini esa uch yilga qadar qamoq jazosi kutishi mumkinligi aytilmoqda.

Kreml rossiyaliklarning qashshoqlashayotganini ko'rsatuvchi raqamlarga ishonmadi

Фото муаллифлик ҳуқуқи Getty Images
Image caption Kreml rossiyaliklarning qashshoqlashayotganini ko'rsatuvchi raqamlarga ishonmadi

Kreml so'zchisi Dmitriy Peskov Rosstat davlat statistika qo'mitasining rossiyaliklarning yangi oyoq kiyim olishga ham qurbi yetmayotgani ko'rsatilgan hisobotidagi raqamlarni savol ostiga oldi. 2018-yil sentyabrida o'tkazilgan so'rovnoma natijalariga asoslangan ushbu hisobotda rossiyaliklarning 80 foizi oydan oyga zo'rg'a yetib olayotgani ta'kidlanadi. Janob Peskov odamlar qanday qilib oddiy oyoq kiyimiga pul topa olmayotganini tushunmasligini ma'lum qilgan.

Bundan tashqari 35.4 foiz rossiyaliklar yangi oyoq kiyim sotib ololmasligi, 11 foiz odam muhim dori-darmonlarni olishga qiynalayotganini bildirgan. Rossiyaliklarning 52.9 foizi esa kutilmagan xarajatlarga tayyor emasligini aytgan. Bu raqam 2016-yilda 44.2 foizga teng bo'lgan.

Kuzatuvchilar 2000-yillardagi yuqori neft narxlari sharofati bilan yuzaga kelgan iqtisodiy o'sish ortidan boshlangan ketma-ket besh yillik iqtisodiy qiyinchiliklarni prezident Putin hukumati uchun jiddiy sinov sifatida baholaydi.

Nissan-Renault sobiq rahbari yana hibsga olindi

Фото муаллифлик ҳуқуқи Getty Images

Avtomashinalar ishlab chiqaruvchi Nissan konsernining sobiq rahbari Karlos Gosn Tokioda yana qayta hibsga olindi. Avvalroq u garov puli evaziga ozod etilgan edi. prokurorlar 65 yashar sobiq rahbarni Nissan'ga $5 million miqdorida zarar yetkazishda ayblamoqda. Janob Gosnning o'ziga bu ayblovlarni tan olmagan.

Yaponiyaning NHK telekanali garov evaziga ozod etilgan shaxsning qayta hibsga olinishini noodatiy holat sifatida tasvirlagan. Janob Gosn Yaponiyaning Nissan va Fransiyaning Renault avtomobil ishlab chiqaruvchilari ittifoqining asoschisi sifatida ko'riladi. U $5 million mablag'ni o'z shaxsiy manfaatlari yo'lida sarflab yuborishda ayblanib, ilk bor o'tgan yilning noyabr oyida hibsga olingan va shu yilning mart oyida $9 million garov puli evaziga qo'yib yuborilgan edi.

3 апрел халқаро янгиликлар

Малайзия собиқ Бош вазири устидан суд бошланди

Фото муаллифлик ҳуқуқи EPA

Малайзия собиқ Бош вазири Нажиб Раззоқ ҳукуматга қарашли 1Malaysia Development Berhad (1MDB) номли стратегик ривожланиш суверен жамғармасидан $681 миллион маблағни ўмаришда айбланмоқда. 1MDB дунёдаги энг йирик молиявий жанжаллардан бири сифатида кўрилади. Мазкур иш бўйича илк суд 12 февралда бошланиши лозим эди, аммо у, кейинроқ, 3 апрелга қолдирилган.

Жаноб Нажиб аксари 1MDB'га боғлиқ жами 42 ҳолатда айбланмоқда. Бироқ у ўзига қўйилган барча айбловларни рад этади. Собиқ Бош вазир билан бир қаторда бир қанча бошқа шахслар ва банклар ҳам жамғарма маблағларини талон-тарож қилишда айбдор, деб топилган.

Жаноб Нажиб Бош вазирлиги даврида - 2009 йилда 1Malaysia Development Berhad жамғармасини ташкил қилган. Жамғарма стратегик инвестициялар орқали мамлакат иқтисодиёти ўсишини жадаллаштириши лозим эди. Бироқ, бунинг ўрнига, жамғарма маблағлари дабдабали ҳаёт ва яхталар учун совуриб юборилгани иддао этилади.

Санкт-Петербург метроси терактида айбланганлар айбини бўйнига олмади

Фото муаллифлик ҳуқуқи Screenshot

Кеча Санкт-Петербургда бундан роппа-роса икки йил муқаддам шаҳар метросида юз берган портлашга алоқадор кўрилган 11 нафар марказий осиёликлар устидан суд бошланди. Улар портлашни уюштирган Акбаржон Жалиловга ёрдам берганликда айбланмоқда. Бироқ улар ўз айбини тан олмаган.

2017 йилнинг 3 апрел куни ўшлик Акбаржон Жалилов Санкт-Петербург метросига икки портловчи ускуна олиб кирган. Уларнинг бири портлаб, 16 нафар инсон, жумладан, Жалиловнинг ўзини ҳам ҳаётдан олиб кетган.

Айбланувчилар тергов жараёни давомида ўзларининг шафқатсиз муносабатга учрагани ва қийноққа тутилганини таъкидлаган. Адвокатлар ва ҳуқуқ ҳимоячиларига кўра, айбланаётган шахслар ва Акбаржон Жалилов ўртасида алоқа мавжуд бўлгани исботланмаган бўлса ҳам, иш судга ошириб юборилган.

Қирғизистон-Россия: Аҳрор Азимов президент Путиндан ўғилларини озод этишни сўради (видео)

Жазоир президенти Абделазиз Бутефлика истеъфо берди

Фото муаллифлик ҳуқуқи EPA

Давлат телевидениеси мамлакатни 20 йилдан буён бошқариб келаётган 82 ёшли Абделазиз Бутефликанинг истеъфо берганини эълон қилди. Жаноб Бутефлика 1 мартдан буён давом этаётган оммавий намойишлар ортидан президентликни топширишга мажбур бўлган. Жазоир армияси ҳам президентнинг ҳокимиятда қолишига қарши чиққан.

Бунга қадар жаноб Бутефлика президентлик сайловида бешинчи муддатга ўз номзодини қўймаслигини маълум қилган эди. Бироқ намойишлар етакчилари бу таклифни қатъиян рад этган. Президентнинг истеъфоси телевидение орқали хабар қилиниши биланоқ пойтахт кўчаларида оммавий байрам бошланиб кетган. Бироқ айрим намойиш етакчилари жаноб Бутефликанинг президентликдан кетиши ҳеч нарсани англатмаслиги ва ҳокимиятнинг демократик йўлда ўзгаришини таъминлаш учун намойишларнинг давом этишини маълум қилган.

Брунейда гейларга қарши қонун кучга кирди

Фото муаллифлик ҳуқуқи Getty Images

Бруней султонлигида ғайритабиий жинсий алоқага қарши қаттиққўл Исломий қонун бугундан кучга кирди. Ушбу қонунга кўра, жинсий алоқа қилишда айбланган гейлар бундан буён тошбўрон қилиш орқали қатл этилади. Халқаро ҳамжамият султон Ҳассанал томонидан илгари сурилган мазкур чораларни «ўрта асрларнинг шафқатсиз қонунлари»га менгзаб, қаттиқ қораламоқда. Аксил гей қонуни билан бир қаторда ўғирлик учун қўлни чопиш каби чоралар ҳам жорий қилинган.

Қонунларга киритилган ўзгартиришлар ортидан қуйидаги ҳолатларга нисбатан ўлим жазоси белгиланади: жинсий зўрлаш, хиёнат, бесоқолбозлик, ўғирлик ва Муҳаммад Пайғамбар номини ҳақорат қилиш. Бироқ гейлар тошбўронга ҳукм этилиши учун ўз айбига иқрор бўлиш ёки тўрт одамнинг гувоҳлиги зарур бўлади.

72 яшар султон Ҳассанал дунёнинг энг бой шахсларидан бири ҳисобланади. Бойлиги нефть ва газ экспортига асосланган султон дунё бўйлаб, Лондондаги Dorchester ва АҚШдаги Beverly Hills Hotel дохил, бир қанча серҳашам меҳмонхоналарга эгалик қилади. Ҳуқуқ фаоллари аксил гей қонунига жавобан султонга тегишли меҳмонхоналарни бойкот қилишга чақирмоқда.

Ўзбекистон: Гомосексуаллик танлов ёки туғма ҳолат?