Prokuror Obidxon qoriga qarshi suiqasdda O‘zbekiston MXXini aybladi

Image copyright none
Image caption Mahkama hukmi tez orada e‘lon qilinishi kutiladi

O‘zbekistonlik taniqli ulamo Obidxon qori Nazarovga suiqasd bo‘yicha Shvetsiyaning Ostersund shahrida kechayotgan mahkama nihoiy pallasiga kirgan.

Mahkama prokurori ayblanuvchilarga 8 yildan 10 yilgacha qamoq jazosi so‘ragan.

"Biz taqdim etgan faktlar hujum tuzum tanqid qilinganligi uchun sodir etilganligi va uning o‘zbek xavfsizlik xizmatlari topshirig‘i bilan amalga oshirilganiga hech qanday shubha qoldirmaydi. Bu faktlar hodisadan keyin to‘plangan qo‘shimcha ma‘lumotlar bilan to‘ldirilgan. Aniqki, (O‘zbekiston) xavfsizlik xizmatlari uni (Obidxon Nazarovni) yirik xavf sifatida ko‘rgan", deb aytgan prokuror.

Ayni daqiqalarda himoya tarafining da‘vosi tinglanmoqda.

Avvalroq, mahkamada Obidxon qori Nazarovning o‘g‘li ko‘rsatmasi tinglangan. U otasining tuzumni tanqid qilgani, xavfsizlik xizmatlari bilan hamkorlikka rozi bo‘lmagani uchun hukumatning dushmaniga aylanganini aytgan.

"Otam haqida televizion ko‘rsatuvlar muntazam berib borilgan. 2010 yilgilari o‘ta jiddiy edi. Ular otam terrorchi sifatida tasvirlangan ko‘rsatuvni namoyish etishdi. Unda otam terrorchi guruhlarni nazorat qilishi va BMT hamda G‘arbdan ko‘mak olishi haqida gapirilgandi", degan Dovudxon Obidxon o‘g‘li.

Shuningdek, u Shvetsiya politsiyasi otasining o‘z hayotiga tahdid bo‘layotgani borasidagi ogohlantirishlarini e‘tiborsiz qoldirganini tanqid qilgan.

Obid qori Nazarov shu yilning 22 fevralida Shvetsiya shimolidagi Stromsund shaharchasida o‘z uyi yo‘lagida noma‘lum qurolli tomonidan otib ketilgandi.

Asli o‘zbekistonlik juftlikka shu yil fevral oyida Stromsund shahrida imomni otgan shaxsga qotillikni uyushtirishda yordam berish ayblovi qo‘yilgan.

Suiqasdni amalga oshirgan asosiy ijrochining hanuz ozodlikda ekanini aytiladi.

54 yoshli Obidxon qori Nazarov hamon shifoxonada koma holatida yotibdi. Bugun mahkamaga ko‘rsatma bergan Dovudxon Obidxon o‘g‘liga ko‘ra, shifokorlar otasining kelajagiga hech qanday umid yo‘qligini aytishgan.