"Yuzingizni oching, aks holda adolat qaror topmaydi"

Bunday da‘vat bilan britan hukumat vaziri Kennet Klark chiqqan.

Janob Kennetning ta‘kidlashicha, ishtirokchilardan biri niqob yoki burqada bo‘lsa ham, mahkama jarayoni risoladagidek bo‘lmaydi.

Kennet Klark o‘z vaqtida Britaniya sobiq Adliya vaziri bo‘lib ham ishlagan.

Unga ko‘ra, xotin-qizlarning mahkama jarayonida niqobda guvohlik berishlariga izn berilmasligi lozim.

Janob Kennetning ta‘kidlashicha, uning so‘zlaridan "Islomdan qo‘rquv" ohanglarini izlashning hojati yo‘q.

Mening nazarimda, hakamlar shohidning xatti-harakatlarini o‘z ko‘zlari bilan ko‘rishlari muhim, deydi u.

Shu yil sentyabr oyida britan mahkamasi guvohlik berguncha xotin-qizlar niqob yoki burqalarini yechishlari shartligi haqida hukm chiqargandi.

Britaniya Ichki ishlar vaziri Tereza Mey xonimlari esa, bundan avval burqa bo‘ladimi yoki boshqa, xotin-qizlar istagan narsalarida yurishda erkin bo‘lishlarini lozimligini aytgandi.

Lekin, shunda ham, Mey xonim lozim bo‘lgan taqdirda, ulardan yuzlarini ochishlari so‘ralishini ham istisno etmagandi.

"Umuman ko‘rib bo‘lmaydi"

Kennet Klark mahkama binosi tashqarisida odamlar "ko‘ngillari tusagan narsada yurishsin", ammo hakamlar uchun mahkama jarayonida ularning yuz-ko‘z ifodalari va tana xatti-harakatlarini ko‘rish muhim. Shu bois ham, bu borada aniq tartib-qoidalar ishlab chiqilishi lozim, deydi.

Hozir biror bir lavozimda bo‘lmagan hukumat vaziri, o‘z o‘rnida, niqobini yechgan paytda xotin-qizlar odamlarning ko‘z o‘ngidan panada bo‘lishlari uchun mahkama zalida lozim shart-sharoitlar yaratilishi taklifini ham ilgari surgan.

"Bosh hakam va hakamlar hay‘ati qanday qilib butkul o‘ranib olgan odamning guvohligiga mutlaq ishonishlari mumkin. Menimcha, bu holat mahkama jarayoniga xalaqit qiladi", - deb aytgan janob Kennet BBCning "The World This Weekend" radio dasturiga bergan suhbatida.

"Bu – 21 asrda odamlar qabul qilishi mumkin bo‘lgan eng g‘ayriodatiy ust-bosh", - deya qo‘shimcha qilgan britan hukumat vaziri.

Leyborist sobiq Ichki ishlar vaziri Jak Strou ham yaqinda mahkama jarayonida guvohlik bergunlaricha xotin-qizlarni niqoblarini yechishga majburlovchi yangi qonun-qoidalar qabul qilinishiga chaqirgandi.

Shu yil sentyabr oyida London mahkamalaridan birida hakam muslima ayolning niqobda hozir bo‘lishiga ruxsat bergan, ammo so‘z navbati yetganda, yuzini ochishi shart ekanini ta‘kidlagandi.

Ammo 22 yoshli muslima ayol erkaklarning ko‘zi o‘ngida niqobini yechib, yuzini ochishdan bosh tortgandi.

Yaqinda Britaniyada ham xotin-qizlarning jamoat joylarida burqa yoki niqobda yurishlari qanchalik maqbul ekani kattagina bahsu munozaralarga sabab bo‘lgandi.

Sog‘liqni saqlash boshqarmasi esa, Angliya shifoxonalarida shifokorlarning butkul yopinib yurinishlariga izn berilishi joizmi-yo‘qligi masalasini ko‘rib chiqmoqda.

Britaniya Sog‘liqni saqlash vaziri Jeremi Hantga ko‘ra, bemorlarning o‘zlarini davolayotgan doktor va hamshirani ko‘rib turishlari muhim.

Boshqa ba‘zi bir britan vazirlari esa, hukumatni muslima qizlarning o‘quv dargohlariga niqobda kelishlarini taqiqlash, bu masalani keng jamoatchilik muhokamasiga qo‘yishga ham undashgandi.