Дональд Трамп Мирзиёевни Америкага таклиф қилди

Мирзиёев Фото муаллифлик ҳуқуқи Facebook/Mirziyoyev

Президент Мирзиёев ўзининг ғарб давлатларига илк расмий ташрифини Америкага амалга ошириши мумкин. Дональд Трамп телефон орқали суҳбатда Ўзбекистон Президентини Америкага расмий ташриф билан келишга таклиф қилган.

"Ўзбекистон 24" каналининг маълум қилишича, 19 декабр куни расмий Вашингтон ташаббуси билан Шавкат Мирзиёев ва Америка Президенти Дональд Трамп ўртасида телефон суҳбати бўлиб ўтган.

Давлат раҳбарлари Америка-Ўзбекистон ҳамкорлиги истиқболлари тўғрисида суҳбатлашган.

"Икки давлат раҳбарларининг май ойида Ар-Риёд ва сентябр ойида Нью Йоркда учрашуви сиёсат, хавфсизлик, савдо, инвестиция, молия, технологик ва маданий-гуманитар соҳадаги алмашинувларда фаолликка сабаб бўлди", дейилади хабарди.

Президент Дональд Трамп Мирзиёевни Америкага расмий ташриф билан келишга таклиф этган.

Ўзбекистон ва Америка ўртасида дипломатик алоқалар 1992 йили ўрнатилган.

2006 йили Ислом Каримов Америкага ташриф буюриб, ўша вақтадги Президент Билл Клинтон билан учрашган.

Ўзбекистон ва Америка муносабатлари 2005 йилгача яхши ривожланган. Бироқ Ғарб давлатлари Андижон қирғинини халқаро коммисия томонидан текширилишини талаб қилиши ушбу илиқ муносабатларга чек қўйди.

Хонободдаги АҚШ ҳарбий базаси ёпилди. Мамлакатнинг бир қанча нодавлат ташкилотлари Ўзбекистондан чиқиб кетишга мажбурланди.

Янги Президент Шавкат Мирзиёев ташқи сиёсатда минтақа давлатлари Ўзбекистоннинг асосий ҳамкори бўлиб қолишини таъкидлаган.

Шундай бўлса-да, Мирзиёев ҳукумати Ғарб билан яқинлашиши сари қадамлар қўяётгани кузатилади.

Президент Мирзиёевнинг Америкага таклиф этилиши ушбу ҳаракатларнинг самараси сифатида кўрилмоқда.

  • Би-би-си Ўзбек хизмати билан Telegram орқали боғланишни истасангиз, телефонимиз: +44 7858860002