Ўзбекистон: Саид-Абдулазиз Юсуповдан интервью олингани йўқ - Бош прокуратура

Фото муаллифлик ҳуқуқи Courtesy

Ўзбекистон Бош прокуратураси 11 июнь куни тиббий кўрикдан ўтказилган журналист Саид-Абдулазиз Юсуповдан прокуратура тайинлаган "махсус журналистлар" интервью олгани ҳақида яқинлари ва фаолларнинг иддаоларини рад этди.

Бош прокуратура матбуот хизмати раҳбари Сурайё Раҳмонова Би-би-сининг бу борадаги сўровига жавобан қуйидагиларни маълум қилди:

"Юсуповнинг укаси (Муҳаммад Баҳовуддин Юсупов - таҳр.) айтганидек, унинг ўзидан ҳеч қандай интервью олингани йўқ. Бунга жиноят иши юритуви қоидалари йўл кўймайди! Тергов давомида бундай амалиёт қўлланилмайди.

- Юсупов 9 та турли тоифадаги шифокор иштирокида барча замонавий тиббий техника ва ускуналар қўлланган шаклда комиссияда экспертиза текширувидан ўтказилди;

- Мазкур текширувда унинг қариндошлари иштироки юзасидан талаб қонунда ҳам, амалиётда ҳам йўқ, ЖПКнинг ўз тартиб-таомили бор, яьни Юсуповнинг қариндошлари айтаётган «конституциявий ҳуқуқи» ЎзР Конституциясида ёки Жиноят-процессуал қонунчилигида кўзда тутилмаган.

- Таажжублиси, яқинлари ёки Юсуповнинг ўзи томонидан тиббий текширувдан олдин ёҳуд кейин бир-бири билан кўришиш фикри билдирилмади.

- Миллий бир нечта интернет нашрлари томонидан комиссиявий экспертиза жараёнини мумкин қадар ёритиш тўғрисида сўров келди. Биз рухсат бердик, уларнинг материали қачон эълон этилишини билмайман- журналистларнинг ўзига ҳавола бу масала. Биз фақатгина экспертиза жараёнида ҳеч бир тўсқинлик ёки ғайриқонуний ҳаракатлар бўлмаганини ОАВ вакиллари томонидан холис кузатилишига имкон бердик".

Аммо Саид-Абдулазиз Юсуповнинг яқинлари Бош прокуратура вакилининг "бир-бири билан кўришиш фикри билдирилмади" деган баёнотини рад этишмоқда.

Онаси Жамила Бакаеванинг айтишича, у Бош прокуратурага ёзган аризасида ўғлининг экспертизасида қатнашишига рухсат беришларини сўраган.

"Мен аризамда ёзмабманми бизнинг иштирокимизда бўлсин бу тиббий экспертиза, деб? Ўша куни боламни менга кўрсатмасдан олиб чиқишмаслиги учун ўзимни машинанинг тагига отдим, ҳа, отдим!", деб ёзди маҳбуснинг онаси 12 июнь куни Фэйсбукда чоп этилган мурожаатида.

У Бош прокуратурани "ёлғон хабар тарқатиш"да айблади.

8 июнь куни Бош прокуратура Саид-Абдулазиз Юсуповнинг ДХХ ҳибсхонасида қийноққа солингани ҳақидаги иддаолар юзасидан текширув ўтказган.

Маҳбуснинг онаси Ж.Бакаеванинг расмий мурожаати асосида ўтказилган текширув ортидан Бош прокуратура "келтирилган важларга асос йўқлиги" ҳақида баёнот берганди.

Аммо яқинлари ва фаоллар текширув хулосаларини савол остига олишган.

Сурайё Раҳмонованинг аниқлик киритишича, "11 июндаги комиссиявий экспертиза тергов устидан назорат олиб борувчи прокурорнинг қарори асосида Юсуповнинг саломатлиги ҳолатини чуқур ва комплекс равишда текшириш мақсадида ўтказилган".

Фото муаллифлик ҳуқуқи Social Media
Image caption Қийноқ иддаолари юзасидан текширув Саид-Абдулазиз Юсуповнинг онаси Ж.Бакаева (чапдан иккинчи)нинг расмий мурожаатидан сўнг ўтказилган

"9 тоифадаги шифокорлар томонидан унинг жисмоний ва психологик соғлиги ҳолати ўрганилди. Яъни дастлабки тиббий кўрик комплекс экспертизага мантиқан алоқаси йўқ", - деб айтди Бош прокуратура вакили.

Ўзбекистон: Саид Абдулазиз Юсупов тиббий экспертизаси театрлаштирилган томошамиди?

Ўзбекистон: Бош прокуратура Саид-Абдулазиз Юсуповнинг қийноққа солинганини рад этмоқда

Унинг сўзларига кўра, Тошкент Тиббиёт Академияси 2-клиникаси (янги ТошМИ-таҳр) даги экспертиза жараёнига бевосита ОАВ киритилиши кўзда тутилмаганди.

Экспертиза ўтказилгандан сўнг Кун.уз, Газета. уз ва Human.uz нашрлари журналистлари шифокорлардан интервью олишган.

Бош прокуратура вакили экспертиза хулосаларининг яқин орада эълон қилинишини маълум қилди.

Унинг таъкидлашича, назорат органи Саид-Абдулазиз Юсуповнинг иши бўйича "максимум очиқликни таъминлашга ҳаракат қилмоқда".

Ўзбекистон мустақил босма оммавий ахборот воситаларини қўллаб-қувватлаш ва ривожлантириш жамоат фонди директори Саид-Абдулазиз Юсупов 10 май куни ДХХ томонидан фирибгарликда гумон қилиниб, ҳибсга олинган.

12 май куни жиноят ишлари бўйича Юнусобод туман суди Юсуповга эҳтиёт чораси сифатида 10 кун қамоқда ушлаб туриш ҳақида ажрим чиқарган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek