Ўзбекистон: Президент сайлови муддатидан илгари ўтиши мумкин – янгиликлар, Мирзиёев, O‘zbekiston, Mirziyoyev, dunyo, yangiliklar

Ўзбекистон: Президент сайлови 24 октябрда ўтиши мумкин - мазкур таклиф кеча, душанба куни Олий Мажлис Қонунчилик палатасида илгари сурилди. Қонун лойиҳаси шу куннинг ўзида жамоатчилик муҳокамасига қўйилди. Ўзбекистондаги сўнгги президент сайлови Каримов вафоти сабаб, 2016 йилда муддатидан илгари чақирилган.

2016 йил 4 декабрида ўтган президент сайловида UzLiDeP партияси номзоди Шавкат Мирзиёев 88,61 фоиз овоз билан ғолиб бўлган эди.

Унда амалдаги президент Шавкат Мирзиёевнинг беллашиш-беллашмаслиги ҳозирча маълум эмас.

bbcuzbek.com дайжести:

Президент сайлови

Президент сайлови декабрь ойидан октябрга кўчирилиши мумкин.

25 январь куни Олий Мажлис Қонунчилик палатасида ўтган йиғилишда сайловни октябрь ойи учинчи ўн кунлигининг биринчи якшанбасида ўтказиш таклиф этилган.

Парламент қуйи палатаси депутатлари Конституцияга бу борада тегишли ўзгартириш ва қўшимчалар киритишни кўзда тутган қонун лойиҳасини биринчи ўқишда кўриб чиққанлар.

Қонун лойиҳаси шу куннинг ўзида жамоатчилик муҳокамасига қўйилган.

Амалдаги қонунчиликка кўра, президент сайлови ҳамда Олий Мажлис Қонунчилик палатаси ва маҳаллий вакиллик органларига сайловлар уларнинг конституциявий ваколат муддати тугайдиган йилда - декабрь ойи учинчи ўн кунлигининг биринчи якшанбасида ўтказилади.

Бироқ халқ вакиллари сайловларнинг декабрь ойида ўтказилиши "Давлат дастурини қабул қилиш ва бошқа ислоҳотларнинг кечиктирилишига сабаб бўлиши"ни таъкидлаганлар.

Эндиликда, депутатлар таклиф этаётган Конституция ва бошқа қонунларга ўзгартириш ҳамда қўшимчалар қабул қилинса, президент сайлови шу йилнинг 24 октябрида ўтиши мумкин.

Декабрь ойининг сўнггида Парламентга мурожаат йўллаган мурожаатида президент Шавкат Мирзиёев 2021 йилга белгиланган сайлов "миллий қонунчилик ва умум қабул қилинган халқаро демократик тамойиллар асосида юқори даражада ўтиши лозим"лигини таъкидлаган эди.

6 январь куни ўтган Марказий сайлов комиссияси йиғилишида президент сайловини ўтказиш масалалари муҳокама этилгани хабар қилинган.

Эндиликда, веб-сайт эгалари Ўзбекистон фуқаролари шахсий маълумотларини Ўзбекистон ҳудудида сақлашга мажбур бўлади.

"Шахсга доир маълумотлар тўғрисида"ги қонунга киритилаётган қўшимча билан билан мулкдор ва операторларга ана шундай мажбурият юкланмоқда.

"Ўзбекистон фуқароларининг шахсий маълумотлари жисмоний жиҳатдан Ўзбекистон ҳудудида жойлашган ва Давлат реестрида рўйхатдан ўтган техник воситалар ёрдамида қайта ишланиши керак", дейилади ўзгартиришда.

Ҳозирча, мазкур талаб аксар ўзбекистонликлар фойдаланиб келадиган ва хорижда рўйхатдан ўтган ижтимоий тармоқларга қанчалик дахл қилишига изоҳ берилмаган.

Янги ўзгартириш апрель ойи ўрталаридан кучга кириши хабар қилинган.

Coca-Cola сотуви ва коррупция

Коррупцияга қарши курашиш агентлиги "Coca-Cola Ichimligi Uzbekiston" компаниясидаги давлат улушини сотиш бўйича тендерни тўхтатиш талаби билан чиққан.

Агентлик тендер талаблари савдоларда иштирок этувчи харидорлар сонини сунъий чеклашга олиб келиши ва коррупцион ҳолатларга шароит яратиши мумкинлигини таъкидлаган.

Агентлик тендер мезонлари ўта юқори ва асосланмаган талаблар ҳисобланишини билдирган.

Ўтган йилнинг декабрь ойида Давлат активларини бошқариш агентлиги (Давактив) Coca-Cola компаниясидаги 57 фоизлик давлат улуши сотувга қўйилганини эълон қилган эди.

Шундан сўнг сотув қонунга зид равишда ўтказилаётгани тўғрисида кўплаб шикоятлар юзага чиққан.

Тендер эркин ўтмаётгани, унда исталган тадбиркор қатнаша олмаётгани ва сотув жараёнида соғлом рақобат муҳити бўғилаётганига оид хабарлар тарқалган.

25 январь куни Давактив давлат улушини сотиш жараёни "ҳалол ва шаффоф усулда ўтаётгани"ни таъкидлаб чиққан.

Давактив жараён шаффофлигини таъминлаш йўлида Коррупцияга қарши курашиш агентлиги ва жамоатчилик билан ҳамкорликка тайёр эканини билдирган.

26 январь куни Коррупцияга қарши курашиш агентлиги компания хусусийлаштирилиши жараёни давом эттирилишига эътирози йўқлигини маълум қилган.

Ўзбек олимлари ва "Британия штамми"

Ўзбек олимлари коронавируснинг янги "британча штамми"ни аниқловчи тест яратиш устида ишламоқда.

Бу ҳақида Инновацион ривожланиш вазирлиги маълум қилган.

Хабарда яратилажак тест тизими борасида қўшимча маълумотлар берилмаган.

Коронавируснинг Британияда топилган янги штамми ўзининг "ўта юқумли" экани билан ажралиб туриши айтилади.

Вируснинг янги кўриниши туфайли аксар давлатлар ўз чегараларини қайтадан ёпиш ва хавфсизлик чораларини кучайтиришга мажбур бўлганлар.

Ўтган ҳафта Бухорога сафари чоғида президент Мирзиёев ҳам "британча штамм"нинг Ўзбекистонга кириб келиши эҳтимолини соқит қилмаган.

Киракашлик ва 2021 йилдан умидлар

Таксичилик фаолиятини соддалаштириш масаласи 2021 йилда ўз ечимини топиши мумкин.

Бандлик ва меҳнат муносабатлари вазири Нозим Ҳусанов 25-куни ўтган брифингда шу ҳақда гапирган.

Вазир ўзига ҳам таксичиликни лицензия талаб қилинмайдиган фаолият турига киритиш борасида таклифлар келаётганини билдирган.

"Лекин бу борада хорижий давлатлар тажрибаси ўрганиб чиқилганида, уларнинг аксариятида бу фаолият лицензиялаштирилган.

Таксичиларга қатор талаблар бор. Чунки бу масалада энг асосий жиҳат инсон ҳаёти ва саломатлиги билан боғлиқдир. Биз шу томонини эътиборга олишимиз керак", деган Ҳусанов.

Унинг сўзларига кўра, ҳозирда мазкур масала ўрганиб чиқилмоқда ва таксичилик фаолиятини соддалаштириш жорий йилда ўзининг ҳуқуқий ечимини топиши мумкин.

Ўзбекистонда таксичилик учун лицензияни бекор қилиш ва шахсий машинада йўловчи ташишга рухсат бериш масаласи йиллардан буён ўртага ташлаб келинади.

Ушбу таклиф тарафдорлари киракашликни эркинлаштириш меҳнат бозорига фойда бўлишини таъкидлайдилар.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek