Ўзбекистон: “Мен Ферузаман”, Зомин ўрмонидаги ёнғин дачадан чиққанми ва ҳаммасига Дельта штамм айбдорми? O‘zbekiston mintaqa dunyo yangiliklar

"Мен Ферузаман"

Ўзбекистонда кўплаб расмийлар ва жамоатчилик фаоллари Qalampir.uz журналисти Феруза Нажмиддинова ҳимоясига отланган.

Бундан аввал журналистнинг суратлари қўшиб монтаж қилинган номақбул видео ижтимоий тармоқларга тарқатиб юборилган эди.

Тарқатилган видеода кўп қаватли уй балконида номақбул хатти ҳаракат қилаётган икки шахсдан бири журналист Феруза Нажмиддинова экани ҳақида сўз боради.

Мазкур ҳолат зудлик билан жамоатчилик фаоллари эътиборига тушган.

Qalampir.uz таҳририяти дохил кўплаб фаоллар бу эълон қилиб келаётган танқидий мақолалари туфайли журналистнинг шаънига доғ туширишга уриниш ўлароқ баҳолаганлар.

Хусусан, президент қизи Саида Мирзиёева журналист аёлларга мурожаат қилиб, уларни мазкур "жирканч воқеа"дан шаштини сўндирмасликка чақирган.

Унинг мурожаати ортидан ижтимоий тармоқда #men_Feruzaman челленжи бошланиб кетган.

Кейинроқ, ҳолат юзасидан Сенат раиси Танзила Норбоева, Ўзбекистон омбудсмани Феруза Эшматова, Ўзбекистон журналистлари ижодий уюшмаси раиси Олимжон Ўсаров, Масс-медиа фонди Васийлик кенгаши раиси Комил Алламжонов, Британиянинг Ўзбекистондаги элчиси Тим Торло каби расмийлар ҳамда жамоатчилик фаоллари муносабат билдириб, видео "буюртмачилари" амалини қоралаганлар, ўзлари журналист билан эканликларини таъкидлаганлар.

Шунингдек, ҳозирга қадар фаолияти туфайли журналистларни обрўсизлантиришга уринишлар давом этиб келаётгани борасидаги фикрлар ҳам янграган.

9 август куни Тошкент шаҳар ИИББ видеода акс этган жуфтликнинг шахси аниқланиб, видеодаги аёл Феруза Нажмиддинова эмаслигига ойдинлик киритилганини маълум қилган.

Бироқ журналистга туҳмат қилинган видео монтажни тайёрлаганлар ва тарқатганлар, ҳозирча, топилмаган.

Енгил тин олган кафе-ресторанлар

Ходимлари эмланган кафе-ресторанлар 10 августдан бошлаб эркин ишлашлари мумкин.

28 июндан буён умумий овқатланиш субъектлари фаолияти соат 8.00 дан 20.00 га қадар чеклаб қўйилган эди.

20 июлдан эса уларнинг ушбу вақт оралиғида фақат очиқ ҳавода ишлашига рухсат берилган эди.

Коронавирусга қарши ушбу чоралар жамоатчилик томонидан кескин танқидларга учраган.

Кўплаб фаоллар пандемияга қарши курашнинг бундай усулининг мантиқий асосларини савол остига олганлар.

Эндиликда, ССВнинг маълум қилишича, ходимлари туридан қатъий назар коронавирусга қарши вакцинанинг камида 2 дозаси билан эмланган кафе-ресторанларга нисбатан бир ярим ойга яқин давом этган чекловлар татбиқ этилмайди.

Вазирлик хабарида, шунингдек, 1 октябрдан ходимлари эмланмаган тадбиркорликва хизмат кўрсатиш субъектлари фаолияти вақтинчалик тўхтатилиши ҳам билдирилган.

Президентликка номзод президент

"Президент Шавкат Мирзиёевнинг учрашувлари ва мажлислари ортида сайловолди пиари ётгани йўқ".

Марказий сайлов комиссияси аъзоси Шерзод Қудратхўжанинг ушбу сўзларини иқтибос келтирган Gazeta.uz нашрининг ёзишича, расмийлар президент Мирзиёевнинг жорий вазифаси ва сайловолди тарғиботи аралаштириб юборилмаслиги назорат қилинишини билдирганлар.

7 август куни ўтган ОАВ вакиллари билан учрашувда МСК раиси ўринбосари Баҳром Қўчқоров номзодларнинг тарғибот жараёнлари тўлиқ назорат қилинишини маълум қилган.

Gazeta.uz Қўчқоровнинг сайлов ташвиқотига оид қоидаларга барча тўлиқ риоя қилиши кераклигини тилга олгани ҳақида ёзган.

Ҳозирги кунга қадар президент сайловида иштирок этиш ҳуқуқи мавжуд барча беш сиёсий партия ўз номзодларини эълон қилган.

Жорий давлат раҳбари Шавкат Мирзиёев номзоди ЎзЛиДеП партиясидан илгари сурилган.

Зоминда яна ёнғин

8 август куни Зомин тоғларида яна ёнғин юзага келган.

Шу куни кечга томон Зомин миллий табиат боғида содир бўлган ёнғин икки соат ичида ўчирилган.

ФВВ 10 сотих майдон ёнғиндан зарарлангани, вазият тўлиқ назорат остида эканини маълум қилган.

1 август куни тумандаги Ўриклисой қишлоғи яқинида йирик ўрмон ёнғини кузатилган эди.

Расмий хабарда 80 гектар майдондаги қуруқ ўт ва дарахтларга зарар етказгани айтилган ёнғин сабаблари борасида турли фаразлар юзага келган.

Kun.uz нашри ўз ихтиёридаги маълумотга таянган ҳолда ўт ҳудуддаги маҳаллий мансабдорга тегишли бўлиши мумкин бўлган дала ҳовлида олиб борилаётган пайвандлаш ишлари туфайли юзага келгани эҳтимоли ҳақида ёзган.

Ушбу фаразга муносабат билдирган Зомин туман ҳокимлиги ёнғин юзага келган ҳудудда Жиззах вилояти ҳокими ва Зомин тумани ҳокимига шахсан тегишли бўлган дала ҳовлилар мавжуд эмаслигини маълум қилган.

Ҳокимлик ҳолат юзасидан республика даражасида махсус ишчи гуруҳ тузилганлиги, ёнғиннинг асл сабабини аниқлаш бўйича ўрганишлар олиб борилаётганини қўшимча қилган.

"Бугунги кунда мамлакатимиздаги касалланиш даражаси Дельта штаммга боғлиқ равишда ўсмоқда".

Санитария-эпидемиологик осойишталик ва жамоат саломатлиги хизмати бўлим бошлиғи Дилором Турсунова Podrobno.uz нашри билан суҳбатда ана шундай баёнотни илгари сурган.

Унинг маълум қилишича, ҳозирда Ўзбекистонда коронавируснинг британча, Дельта ва Ухан штаммлари рўйхатга олинган бўлиб, тарқалиш кўлами бўйича Дельта штамми пешқадам бўлиб турибди.

Ўтган йилнинг сўнггида Ҳиндистонда аниқланган Дельта штамми ўзининг юқувчанлик хусусияти ва ўлимга сабаб бўлиш даражаси билан хавфли дея кўрилади.

Охирги бир ойдан бери Ўзбекистонда коронавирус билан боғлиқ вазият жиддийлашиб бормоқда.

Кунлик аниқланган касалланишлар сони бўйича кетма-кет антирекорд ўрнатилмоқда.

ССВнинг маълумотларига кўра, 8 август куни мамлакатда 856 инсонда коронавирус аниқланган, яна 6 бемор оламдан кўз юмган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek