Ўзбекистон: Президент куёви "Капиталбанк"даги акцияларини 50 фоизга етказди O'zbekiston

Ўзбекистондаги веб-саҳифалар эътиборини Президент Шавкат Мирзиёевнинг куёви Ойбек Турсунов "Капиталбанк"даги улушини кўпайтиргани ҳақидаги хабар жалб этди.

"Тошкент" Фонд биржаси акционерлик жамиятларидаги устав капиталининг 20 ёки ундан кўп фоиздаги улушига эгалик қилаётган акциядорлар ҳақидаги маълумотни ошкор этган.

Фонд биржаси маълумотларига кўра, шу йил 29 октябрида Ойбек Турсунов "Kapitalbank" акциядорлик тижорат банки устав жамғармасининг 34,10 фоизлик акциясини биржадан ташқари савдода сотиб олган.

Булар 112490703 та оддий акция.

Шу билан акционер ҳисобидаги жами акциялар сони 164927890 тани ташкил этгани айтилади.

Ўзбекистондаги Spot.uz сайти хабар қилишича, Ойбек Турсуновга тегишли компания 2019 йили "Капиталбанк"нинг 40,13 миллион дона акциясини сотиб олган.

Spot.uz га кўра, Ойбек Турсунов 2020 йили Uzcard устав жамғармасининг 75 фоизлик улушини сотиб олган.

Бироқ кейинроқ 51 фоизлик назорат пакети Ўзбекистон Миллий банкига, 6 фоизи эса мамлакатдаги тўртта банкка ўтказилган.

Президент куёви Uzcard таъсисчилари рўйхатидан чиқарилдими?

Бугунги кунда "Капиталбанк" Ўзбекистондаги етакчи ва энг фаол хусусий банклардан бири деб кўрилади.

Мамлакатда амалда бўлган етти электрон тўлов тизимидан учтаси - Wooppay, Interpay ва A-pay "Капиталбанк"ка тегишли.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek