'Хоразм обод эмас, барбод бўлаяпти'

"Нажот" инсон ҳақларини ҳимоя қилиш ташкилоти эълон қилган янги ҳисоботга кўра, Хоразм вилоятида ободончилик мақсадида амалга оширилаётган дастур аксинча вайронагарчиликка олиб келмоқда экан.

"Нажот"га кўра, ушбу дастур доирасида олиб борилаётган ишлар фуқароларнинг хусусий мулклари- уйларини бузишдан иборат бўлмоқда.

Бу амаллар маҳаллий амалдорларнинг зўравонлиги, дўқ ва таҳдидлари билан амалга оширилмоқда.

Би-би-си бу ҳолатлар Хоразм вилоятининг айнан қайси туманларида кузатилаётгани ҳақида "Нажот" ташкилоти раҳбари Ҳайитбой Ёқубов билан суҳбатлашди.

Унга кўра, ташкилотга фуқаролардан етиб келган аризалар асосида ўтказилган мониторинг натижасида шу нарса аниқланганки, бу каби ҳолталар вилоятнинг деярли ҳамма туманларида кузатилмоқда.

Ҳайитбой Ёқубовнинг айтишича, расмийлар ободончилик соҳасида янги қонун-қоидаларни киритиб, уйлар ўнгида яратилган кичик боғлар, экилган экинлар, шунингдек, ўрнатилган безак панжара ва айвончаларни бузиб ташламоқдалар.

Бу амаллардан норорзи бўлган аҳоли вакилларидан "Нажот" га етиб келаётган шикоятлар сони охирги вақтда ошган.

Расмийлар нима учун айнан ҳозир бу амалларга қўл урганликлари сабабини изоҳламаганлар, шунчаки қўлларидаги ҳужжатга ишора қилиб, боғ ва айвончалар ноқонуний эканлигини айтиб, бузиб ташлашни талаб қилмоқдалар.

Ушбу муаммонинг яна бир жиҳати борки, иш топиш муаммоси туфайли кўплаб эркаклар меҳнат муҳожирлигига кетганлари сабаб кўп уйларда фақатгина аёллар ва қариялар қолишган.

Уларнинг барбод этилган боғ ва қурилмаларни бузиб ташлаш учун на имкониятлари ва кучлари бор.

Бузиш учун бировни ёллашга эса маблағ керак.

Би-би-сига маълум бўлишича, худди шундай "ободончилик" баҳонаси билан Қашқадарё вилоятида ҳам хусусий хонадонлар бузилмоқда.

Айни ҳолат Шаҳрисабз шаҳрида кўпроқ кузатилаётгани айтилади.

Ҳайитбой Ёқубовнинг айтишича, 2013 йили Хива шаҳрининг "Гиламчи" маҳалласини расмийлар намунали маҳаллага айлантириш мақсадида, дея ҳудди шу каби ободончилик дасутрини бошлашган.

"Ҳозирда ўша маҳаллага кирсангиз бир вақтлар обод бўлган маҳалла ғишт, қум, тупроқ уйумларига тўла ерга айланган", дейди ҳуқуқ фаоли.

Мултимедиа ўйнаш бу қурилмада дастакланмайди