Новичок можароси: Икки гумондор "ортида Путин турибди"

Фото муаллифлик ҳуқуқи PA
Image caption Британия полицияси икки Россия фуқаросидан гумонсирамоқда

Владимир Путин Солсбери шаҳридаги Новичок ҳужуми учун жавоб бериши керак, деб айтди Британия хавфсизлик вазири Бен Уоллес.

Вазирнинг айтишича, заҳарланиш ҳодисаси ортида "алал-оқибат, албатта" Россия президенти турибди.

Россиялик собиқ жосус 66 яшар Сергей Скрипаль ва унинг 33 яшар қизи Юлия 4 мартда новичок билан заҳарланганди.

Британия ҳукумати вакиллари ҳужумни амалга оширишда гумон қилинган икки киши бўйича пайшанба куни БМТ Хавфсизлик кенгашига ҳисобот беришлари кутилади.

Бош вазир Тереза Мейга кўра, бу икки шахс Россиянинг ҳарбий жосуслик хизмати - ГРУ зобитлари экани ишонилади.

Уоллеснинг айтишича, Путин ҳукумати ГРУни назорат қилади, молиялайди ва ҳарбий жосуслик амалиётларини бошқаради, ва ҳеч ким Путин "ўз давлати устидан назоратга эга эмас" дея олмайди.

Image caption Икки гумондор

Москва ҳужумга алоқадорликни рад қилади.

Чоршанба куни парламент олдида чиқиш қилган Мей икки гумондор Британияга кириш учун ишлатган рус паспортларидаги исмлар Александр Петров ва Руслан Боширов бўлганини билдирди.

Бош вазир урғулашича, бу оддий амалиёт эмас, балки Россия давлатининг юқори идоралари томонидан бошқарилган амалиёт бўлган.

Тереза Мэй: "Скрипал Россияда ишлаб чиқарилган модда билан заҳарланган"

Британия Россиянинг 23 дипломатини чиқариб юбормоқда

BBCUZBEK.COM билан Telegram орқали +44 7858860002 номери билан боғланинг. Telegram каналимиз: https://t.me/bbcuzbek