Dunyo, yangiliklar: Tereza Meyning ko'z yoshlari

Фото муаллифлик ҳуқуқи Leon Neal

Tereza Mey 7 iyunda Konservatorlar partiyasi rahbarligidan ketishini eʼlon qildi, ammo yangi rahbar saylangunicha Bosh vazir lavozimida qoladi.

Parlament saylovlaridan keyin Britaniya bosh vaziri lavozimini tark etadi.

Mey oʻz qarori haqida Tashqi ishlar vaziri Jeremi Xant va Ichki ishlar vaziri Sojid Jovid bilan uchrashuvdan soʻng maʼlum qilgan.

Дунё, янгиликлар: Одам жасадидан ким ўғит сифатида фойдаланмоқчи?

Дунё, янгиликлар: Трамп Эронни йўқ қилиб юбориш билан таҳдид қилдими?

Ислом ва дунё: Ўшда мусулмон бўлган хитой

Har ikki vazir Tereza Meyning Yevropa Ittifoqidan chiqish boʻyicha yangi rejasidan xavotir bildirgandi.

Mey "breksit" tarafdorlari gʻalaba qilgan 2016 yildagi referendum natijasini hayotga tadbiq qilish uchun qoʻlidan kelgan hamma narsani qilganini aytdi.

Tereza Mey Britaniyaning ikkinchi ayol bosh vaziri.

U Dauning-stritdagi hissiyotli nutqini ko'z yoshlari bilan tugatgan.

Oʻzining aytishicha, "brekit"ni amalga oshira olmagani uchun bir umr afsus qiladi.

Ammo, deya qoʻshimcha qildi u, endi mamlakatni boshqa odam boshqarishi kerak va bu hammaning manfaatiga toʻgʻri keladi.

Фото муаллифлик ҳуқуқи AFP

Bruney sultoni Oksford Universiteti darajasidan voz kechishga majbur boʻldi

Mamlakatda qabul qilingan geylarga qarshi qonunlar Oksford Universiteti maʼmuriyatini tashvishga solgan.

Aprel oyida sulton Hassanal Bolkiah geylarning toshboʻron qilib oʻldirishni koʻzda tutuvchi qonunlarga imzo chekkan edi.

Biroq xalqaro hamjamiyat tanqidi va bosimi ortidan sulton ushbu qonunlar kuchga kirishini ortga surgan.

Oʻtgan oyda Oksford Universiteti "yangi jazo kodeksi" yuzasidan oʻz xavotirini bildirgan.

118 mingdan ziyod odam petitsiya imzolab, universitetdan 1993-yilda sultonga berilgan faxriy darajani qaytarib olishni talab qilgan.

Nihoyat, Oksford Universiteti soʻzchisi sulton Bolkiah ushbu darajadan voz kechishga qaror qilganini maʼlum qilgan.

Gomoseksual munosabatdagi insonlarni toshboʻron qilish toʻgʻrisidagi qonunlarning joriy etilishi nomaʼlum muddatga kechiktirilgan boʻlsada, Bruneyda geylik uzoq yillardan buyon qonunan taqiq ostida boʻlib, bunday xulq-atvorda ayblangan odamlar 10 yilga qadar ozodlikdan mahrum etilishi mumkin.

Фото муаллифлик ҳуқуқи Getty Images

Ilon Mask Yer yuzini arzon va tezkor internet bilan taʼminlash ishlarini boshladi

Ishbilarmon Ilon Maskning SpaceX kompaniyasi internet yetib bormagan hududlarni arzon va tezkor tarmoq bilan qoplashga moʻljallangan sunʼiy yoʻldoshlar tizimini orbitaga chiqarishning birinchi bosqichiga kirishdi.

Bugun tongda Floridada koʻtarilgan Falcon-9 raketasi ana shunday sunʼiy yoʻldoshlarning ilk 60 tasini orbitaga olib chiqqan.

SpaceX, umumiy hisobda, 12 mingga yaqin sunʼiy yoʻldoshni yaqin yillar ichida orbitaga olib chiqishni rejalashtirmoqda.

Yaratilajak sunʼiy yoʻldoshlar tarmogʻi Starlink deb nomlangan.

Ishlab chiqilgan konsepsiyaga koʻra, Starlink tarmogʻi sunʼiy yoʻldoshlari Yer orbitasining 2,000 kilometrdan yuqori boʻlmagan qismida aylanib, rivojlanmagan hududlarni tezkor internet bilan taʼminlaydi.

SpaceX bergan maʼlumotlarga koʻra, har bir sunʼiy yoʻldosh 227 kilogramm tosh bosib, yuqori oʻtkazuvchanlik xususiyatiga ega bir qancha antenna va quyosh paneli bilan taʼminlangan.

Shuningdek, ularni harakatlantiruvchi tizim uchar qurilmalarni osmonda barqaror turishiga yordam beradi.

Ilon Mask bugun uchirilgan sunʼiy yoʻldoshlar sinov tizimida ekanini maʼlum qilib, keyinroq orbitaga olib chiqiladigan avlodning anchayin takomillashgan boʻlishini taʼkidlagan.

Фото муаллифлик ҳуқуқи AFP

Narendra Modi yana Hindiston Bosh vaziriga aylandi

Bir oydan oshiq davom etgan dunyodagi eng yirik demokratik saylov oʻlaroq koʻrilgan qudrat poygasida Hindiston Bosh vaziri Narendra Modi oʻz lavozimini saqlab qolishga muvaffaq boʻlgan.

Muxolifatdagi asosiy kuch - mashhur Gandilar sulolasi vakili Rahul Gandining Kongress partiyasi oʻz magʻlubiyatini tan olgan.

Janob Modining Bharatiya Janata partiyasi (BJP) parlamentdagi 543 oʻrindan 300 ga yaqinini egallagani xabar qilinmoqda.

Janob Modi gʻalaba uchun Hindiston xalqiga tashakkur izhor etgan.

Avvalroq, ushbu saylov Narendra Modiga nisbatan ishonch referendumi oʻlaroq koʻrilgan edi.

Bosh vazir Modi davrida mamlakatda ishsizlik rekord darajaga yetgan, dehqonlar daromadi va sanoatda turgʻunlik yuzaga kelgan edi.

Soyadagi iqtisodiyotga qarshi kurash doirasida oʻtkazilgan demonitizatsiya (pul almashishi) va soliq tizimi islohotlaridan hindistonliklarning katta qismi zarar koʻrgan.

Bundan tashqari, Modi hukumati davrida hind millatchiligi avjiga olib, etnik ozchiliklar yanada koʻproq tazyiqqa uchragan.

Shunga qaramay, saylov natijalari odamlarning janob Modiga nisbatan hali ishonchi yoʻqolmaganini koʻrsatmoqda.

AQSh Julian Assanjga yangi ayblovlar eʼlon qildi - u 180 yilga qamalishi mumkin

AQSh adliya vazirligi Wikileaks asoschisi Julian Assanjga qarshi 17 band boʻyicha ayblovlarni ilgari surgan.

Janob Assanj maxfiy hujjatlarni ommaga oshkor qilish, mamlakat xavfsizligiga oid maʼlumotlarni noqonuniy yoʻlda qoʻlga kiritib, eʼlon qilishda ayblanmoqda.

Bunga qadar janob Assanjga qarshi faqat bitta ayblov ilgari surilgan edi: AQSh razvedkasi sobiq tahlilchisi Chelsi Menning bilan til biriktirib, Pentagon kompyuter tizimiga buzib kirish.

Agar mazkur ayblovlar sudda oʻz isbotini topsa, Wikileaks asoschisi 180 yilga qadar ozodlikdan mahrum etilishi mumkin.

Фото муаллифлик ҳуқуқи CATI CLADERA

Пентагон Яқин Шарққа қўшин юборишга тайёрланмоқда.

23 май куни Пентагон Оқ Уйга Яқин Шарққа қўшимча АҚШ қуролли кучлари контингентини киритиш режасини тақдим этиши хабар қилинмоқда.

Қўшимча кучлар АҚШ ва Эрон муносабатларининг совуқлашиши фонида «мудофаа мақсадлари»да минтақага юборилаётгани айтилади.

Шахси сир сақланган америкалик расмийлар сўзидан иқтибос келтирган Associated Press агентлиги ва CNN телеканалининг маълум қилишича, гап беш мингдан ўн мингга қадар ҳарбийни Яқин Шарққа жўнатиш тўғрисида кетмоқда.

Аввалроқ, Reuters агентлиги Қўшма Штатлар Марказий Қўмондонлиги (CENTCOM) Яқин Шарқдаги АҚШ ҳарбийлари сонини беш минг нафарга оширишни сўраб, Пентагонга мурожаат йўллаганидан бохабар бўлган эди.

CENTCOM'нинг масъулият ҳудудига 21 давлат, жумладан, Эрон, Афғонистон, Ироқ, Сурия, Яман ва Марказий Осиё давлатлари киради.

Бундан ташқари, CENTCOM Қизил Денгиз, Форс Кўрфази ва Ҳинд Уммонининг ғарбий қисмидаги халқаро сувларини назорат этади.

Бироқ хабар агентликлари Оқ Уй Пентагон режасини маъқуллайдими ё йўқ, деган саволга, ҳозирча, жавобни қўлга кирита олмаган.

Оқ Уй Пентагон сўровини рад этиши ёки сўралган ҳарбийлар сонининг маълум қисмини юборишга розилик билдириши мумкин.

Бир неча кун олдин Пентагон, агар Эрон АҚШ ҳарбийларига ҳужум қилса ёки ядро қуроли яратиш бўйича ишларни тезлаштиргудек бўлса, минтақага 120 минг аскар юбориш билан таҳдид қилган эди.

АҚШ, аллақачон, Форс кўрфазига ўзининг авиаташувчи ва бошқа ҳарбий кемаларини киритиб улгурган.

Қатардаги Америка ҳарбий базасига эса Б-52 бомбардимончилари етиб борган.

Huawei Android'га муқобил ўз операцион тизимини яратмоқда

Фото муаллифлик ҳуқуқи Getty Images
Image caption Манбалар хабар қилишича, Huawei ўз операцион тизимини яратиш устида 2012 йилдан буён иш олиб боради

АҚШ босими ва Google тақиқига учраган Хитойнинг Huawei технология гиганти мавжуд оғир вазиятдан чиқиб олиш йўлларини изламоқда.

Турли нуфузли нашрларнинг ёзишича, компания HongMeng номли ўз операцион тизими устида иш олиб бормоқда.

Huawei вакилларининг сўзларига кўра, агар компания Google ва Microsoft экотизимларидан фойдалана олмас экан, ўз операцион тизимини ишга солишга мажбур бўлади.

Турли нашрларда Huawei ушбу операцион тизимни 2012 йилдан бери такомиллаштириб келаётгани айтилади.

Компания янгиликларини ёритиш билан шуғулланувчи Huawei Central порталининг маълум қилишича, HongMeng бир вақтнинг ўзида турли платформалар - смартфонлар, планшетлар ва компьютерларда қўлланишга мўлжалланган.

«HongMeng дунёдаги энг йирик мобил операцион тизимлардан бирига айланишининг эҳтимоли анча юқори,» ёзади Huawei'га яқин манбалардан бирининг сўзларини келтирган портал.

Бироқ ҳозирча янги операцион тизим тўғрисида маълумотлар жуда кам.

Huawei мобил қурилмалар сотуви бўйича дунёда, Samsung'дан сўнг, иккинчи ўринда туради.

Олимлар озон қатламини емираётган хавфли газ манбайини Хитойдан топди

Фото муаллифлик ҳуқуқи Getty Images

Сўнгги олти йилдан буён олимларни ташвишлантириб келаётган озон қатламини емирувчи тақиқланган CFC-11 газининг йирик манбаси Хитойнинг шарқий провинцияларидан топилгани хабар қилинмоқда.

CFC-11 1930 йилларда совитиш тизимларида қўлланиши кўзда тутилган газ сифатида ишлаб чиқилган.

Бироқ XX асрнинг иккинчи ярмига келиб, олимлар ушбу газдан ажраб чиқувчи хлорин атомлари озон қатламини шиддат билан емириш хусусиятига эга эканини аниқлаганлар.

Озон қатлами эса бизни хавфли ультрабинафша нурларидан ҳимоя қилади.

Натижада, 2010 йилда CFC-11 газини ишлаб чиқариш дунё миқёсида тўхтатилган эди.

Аммо атмосферани кузатиб келувчи халқаро олимлар жамоаси 2018 йилда Шарқий Осиёдан келаётган газнинг янги манбасини аниқлаганлар.

Шундан сўнг, ерда бошланган тадқиқот, ҳақиқатан ҳам, Хитойда CFC-11 газининг илк аломатларини топган.

Мамлакат шарқида турар-жойлар учун полиуретан изоляция кўпикларини ишлаб чиқарувчи кўплаб фирмалар мазкур газдан фойдаланаётгани маълум бўлган.

Олимлар билан суҳбатлашган ишлаб чиқарувчилардан бири CFC-11 газининг бошқа муқобилларга қараганда, юқори сифатли ва арзон эканини билдирган.

Олимларга кўра, CFC газлари юқори даражали иссиқхона таъсирини юзага келтириш хусусиятига эга бўлиб, унинг бир тоннаси кучи ис газининг беш тоннасига тенгдир.

Ушбу тадқиқотга муносабат билдирган Хитой ҳукумати «ноқонуний ишлаб чиқарувчилар»ни аниқлаш борасида аллақачон иш бошлаб юборганини маълум қилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek