Коронавирус: Жорий вакциналар "Омикрон"дан муҳофаза қилади Koronavirus
Сурат манбаси, Getty Images
Жаҳон Соғликни сақлаш ташкилоти маълумотларига "Омикрон" 57 мамлакатда аниқланган
Коронавируснинг янги тарқалган "Омикрон" варианти қандай хусусиятларга эга, ҳозир дунё бўйлаб одамлар эмланаётган вакциналар "Омикрон"дан ҳимоя қиладими, деган саволларга дастлабки илмий тадқиқот хулосалари олинди.
Жанубий Африка Республикасидаги олимлар ўзларининг илк лаборатория тадқиқотлари хулосаларини эълон қилдилар.
Маълум бўлишича, "Омикрон" штамми коронавирусга қарши эмланган инсон организмида пайдо бўлган аксилтаналарни айланиб ўтолади, аммо вакцина ҳимоясини тўла бузолмайди.
ЖАРдаги тадқиқотчилар Pfizer вакцинасининг икки дозаси билан эмланган 12 иштирокчидан 14 плазма намунасини олишган ва улар "Омикрон" плазмасини йўқ қилоладими ёки йўқлигини текширишган.
Текшириш натижасида "Омикрон" бундан олдин тарқалган вариантларга қараганда хавфлироқ эмаслиги аниқланган.
Жаҳон Соғликни сақлаш ташкилотига кўра, "Омикрон" аксилтаналар пайдо қилган ҳимояни "Дельта"га нисбатан яхшироқ бузиб ўта олишининг ҳозирча бирор бир аломати топилмаган, жорий вакциналар "Омикрон"ни юқтирган инсонни хасталикнинг оғир шаклидан муҳофаза қилоладилар.
Сурат манбаси, Reuters
Олимларнинг айтишича, коронавирусдан фақат эмлаш ва ижтимоий масофани сақлаш билан қутулиб қолиш мумкин
Ковидни юқтирган ва аксилтана пайдо бўлган инсонларнинг организми ҳам "Омикрон"га чидамли деб кўрилмоқда.
Яқин кунларда Pfizer/BioNTech вакцинаси "Омикрон"дан қанчалар самарали ҳимоя қилишига бағишланган тадқиқот натижаларининг тафсилоти эълон этилиши кутилмоқда.
Бундан олдин Pfizer компаниясининг раҳбари Альберт Бурла Pfizer/BioNTech вакцинасининг уч дозаси "Омикрон"дан юқори фоиз ҳимоя беришади деб айтган эди.
Бироқ ҳозирги вакцинанинг ўзи етарлими ёки вакцинанинг янада кучлироқ янгисини ишлаб чиқариш керакми, бу саволга жавоб топиш учун бир неча ҳафта зарурлиги айтилмоқда.
Сурат манбаси, EPA
Ноябрь ойида илк бор Жанубий Африкада аниқланган "Омикрон" бутун дунёга тарқаяпти
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
