Xitoylik o‘spirin tablet kompyuteri sotib olish uchun o‘z buyragini sotdi

Image caption Xitoyda tana a‘zolari oldi-sotdisi bo‘yicha qora bozor mavjudligi oshkor bo‘ldi

Xitoy matbuotining xabar berishicha, Apple shirkati tomonidan chiqarilgan o‘ta ommabop iPad-2 rusumli tablet kompyuterini sotib olish uchun bir o‘spirin o‘z buyragini sotgan.

17 yoshli Zang Kay mahalliy televideniyega o‘z buyragini sotishni internet orqali kelishib olganini aytgan.

U iPad-2 tablet kompyuteriga ega bo‘lishni anchadan buyon orzu qilib yurganini aytgan.

Zangning ma‘lum qilishicha, noqonuniy vositachilar uni shifoxonaga olib borishgan va jarohlik amaliyotidan keyin uning qo‘liga 4 ming dollar tutqazishgan.

Talaba bu pulga iPad-2 va laptop sotib olganini aytadi.

Xitoy matbuotiga ko‘ra, ushbu voqea, o‘spirinning onasi undan shubhalana boshlagach, oshkor bo‘lgan.

Zang Kay onasi uning tanasidagi chuqur chandiq va kompyuterlarni payqab qolgach, o‘z buyragini sotganini e‘tirof etgan.

Ushbu hodisa Xitoyda inson tana a‘zolari oldi-sotdisi bo‘yicha qora bozor mavjudligini ko‘rsatadi.

Xitoy hukumati 2007-yilda inson tana a‘zolari savdosini ta‘qiqlovchi qonunni tasdiqlagan.