Шинжон Уйғуристонида яна зўравонлик, қурбонлар бор

Фото муаллифлик ҳуқуқи AP

Хитойнинг азалдан мусулмон уйғурлар яшаб келган ушбу ғарбий минтақасида юз берган навбатдаги тўқнашувда 16 киши қурбон бўлган.

Ҳодиса якшанба куни тунда Қашғар яқинидаги қишлоқда рўй берган.

Бу ҳақда Хитой давлат матбуоти хабар бермоқда.

Расмий хабарларга кўра, ҳибсга олиш учун келган полиция ходимлари қаршиликка учрайди.

Уларга қарши портловчи моддалар ва пичоқлар қўлланади.

Аммо хабарда бу шахсларнинг ким эканликлари очиқланмайди.

Аён бўлишича, полиция ходимлари 14 кишини отиб ўлдиради, икки ходимини ҳам бой беради.

Хитойнинг ушбу минтақасида бу каби тўқнашувлар тез-тез юз бериб туради.

Ҳукумат бу каби зўравонликларда, одатда, экстремистларни айблаб келади.

Уйғур фаолларига кўра эса, бунга этник танглик ва Хитой ҳукуматининг қаттиққўл бошқаруви сабабдир.

Шинжондан олинган хабарларни мустақил манбалардан тасдиқлаш доимо қийин.

Чунки хитойлик масъуллар ушбу минтақага оид ҳар қандай маълумотни кескин назорат этишади.

Айрим расмий хабарларда юз берган сўнгги зўравонлик юзасидан икки кишининг ҳибсга олингани ҳам айтилади.

Ўтган ой ҳам Хитой давлат оммавий-ахборот воситалари Қашғар яқинидаги полиция идорасига уюштирилгани ҳақида ҳабар берганди.

Ушбу ҳодисада 11 киши қурбон бўлгани, улардан икки нафарининг полиция ходимлари экани ҳақида айтилганди.

Октябр ойи охирида эса, Тянаньмен майдонида машина ёрдамида амалга оширилган портлаш ҳам 5 кишининг умрига зомин бўлганди.

Расмий Пекин юз берган ҳодисани террорчилик амали атаган ва унда Шинжонга боғлиқлиги бўлган экстремистларни айблаганди.

Полиция ёниб кетган машина ичида бўлган уч киши шинжонлик уйғурлар, деган хулосага келганди.

ҚИСҚАЧА МАЪЛУМОТ ЎРНИДА:

  • Уйғурлар туркий қавмга мансуб мусулмонлар
  • Улар ҳозирги кунда минтақа аҳолисининг қарийб 45 фоизини ташкил этишади.
  • Қолган аҳолининг 40 фоизи эса, хитойлик ханлардан иборат.
  • Хитой янги ташкил топган Шарқий Туркистон давлатини қисқа вақтнинг ичида яксон этиб, 1949 йилда минтақа устидан қайта ўз назоратини ўрнатади.
  • Орада кечган вақт давомида эса, минтақага катта сондаги ханларни кўчириб боришга муваффақ бўлади.
  • Буларнинг барчаси оқибатида уйғурлар қадим маданиятларининг буткул йўқ бўлиб кетишидан хавотирга тушиб қолишган.