Sexual harassment bill: Àwọn aṣòfin buwọ́lu ẹ̀wọ̀n ọdún mẹ́rìnlá f'olùkọ́ tó bá fọwọ́ kan akẹ́kọ̀ọ́bìnrin lọ́nà àìtọ́

Obinrin

Oríṣun àwòrán, Gettty

Ile igbimọ aṣofin agba l'Abuja ti buwọlu ofin to tako fifọwọ kan obinrin lọna aitọ laarin awọn olukọ si akẹkọọ ni Naijiria.

Lara ijiya ti awọn aṣofin naa fọwọ si fun ẹnikẹni ti aje ọrọ naa ba ṣi mọ lori ni ẹwọn ọdun marun un si mẹrinla.

Awọn asọfin naa mu ofin ọhun lọkunkundun lẹyin iwadii ẹsun ibalopọ ti ileeṣẹ iroyin BBC ṣe, eyi to tu aṣiri awọn olukọ kan ni Fasiti ilu Eko ati Fasiti Ghana.

Lara awọn ohun to wa ninu ofin naa ree:

1. Olukọ kankan ko gbọdọ ba akẹkọọ ni ibalopọ tabi ko beere fun ibalopọ lọwọ ọmọ to n kọ nile iwe.

2. Olukọ ko gbọdọ ṣẹruba akẹkọọ nitori o n fẹ lati ba a lopọ.

3. Olukọ ko gbọdọ ran ẹlomiran si akẹkọọ lati ba a lopọ.

4. O ti di eewọ fun olukọ lati gbá ibadi akẹkọo mu, tabi ko dimọ ọ, ko fi ẹnu ko o ni ẹnu tabi ko fi ọwọ kan ara tabi ọyan irufẹ akẹkọọ bẹẹ.

5. Bakan naa ni olukọ ko gbọdọ fi aworan ihoho rẹ tabi ti ẹlomiran ranṣẹ si akẹkọọ rẹ lori ayelujara tabi nipa ọna miran.

6. Olukọ ko tun gbọdọ dínjú si akẹkọọ, ko gbọdọ súfèé tabi ba a ṣere lọna to la erongba ibalopọ lọ.

Ki lo kọkọ ṣẹlẹ ki ọrọ yii to di ofin lónìí?

Sex for Grade: Ọwọ́ àwọn aṣòfin yóò bẹ̀rẹ̀ sí ní tẹ àwọn olùkọ́ fásitì olójúkòmúòlọ

Oríṣun àwòrán, @NGRSenate

Ile igbimọ aṣofin orilede Naijiria yoo ṣe ipade lori abadofin kan ti wọn gbero lati fi ṣe ofin ti yoo lodi si ilọkulọ ibalopọ lawọn ile iwe giga fasiti Naijiria.

Abadofin naa yannana ẹwọn ọdun marun un gbako fun olukọ ti ọwọ ofin ba tẹ pe o n fi ilọkulọ ibalopọ lọ akẹkọbinrin tabi ọkunrin.

Wọn ṣe agbekalẹ abadofin yii lẹyin ti ẹka ileeṣ BBC to n tu aṣiri awọn ohun ti ko dara lawujọ, BBC Africa Eye gbe fidio iwadii kan sita.

Iwadii yii lo ṣafihan fifi ilọkulọ ibalopọ lọ akẹkọọ ki wọn ba a le fun wọn ni maaki eyi to maa n wa latọdọ awọn olukọ fasiti.

Eyi ni igbesẹ ti ile igbimọ aṣofin agba gbe bayii gẹgẹ bi ọna ati mu awọn to ba ru ofin to ni ṣe pẹlu ibalopọ lawọn fasiti orilẹ-ede Naijiria.

Yatọ fun fifi ẹwọn jura, abadofin naa tun sọrọ lile tabi aṣẹ lọ rọọkun nile fun awọn akẹkọọ ti ile ẹjọ ba ri i pe irọ ni ẹsun ti wọn n fi lọ pe olukọ fẹ fipa ba awọn lo pọ.

Ẹwẹ, ile igbimọ aṣofin agba ti fi abadofin naa ṣọwọ si igbimọ to tun duro ire lori ọrọ idajọ, ẹtọ ọmọniyan ati ọrọ ofin.

Bi abadofin naa ba di gbigba wọle nile igbimọ aṣofin agba ti wọn si fi ṣọwọ si ile igbimọ aṣojuṣofin, ti awọn mejeji ati aarẹ si fọwọ si i ko fi di ofin.

Àkọlé fídíò,

Kemi Dairo: Iṣẹ́ abẹ nínú ọpọlọ àti ẹ̀rọ ni mo fi ń gbọ́ ọ̀rọ̀ báyìí

Oṣu kẹwaa ọdun to kọja ni akanṣe iroyin BBC kan jade to tu aṣiri awọn aṣemaṣe ibalopọ to n wa latọwọ awọn olukọ fasiti ni ile iwe giga fasiti meji pataki kan nilẹ Afirika.

Aṣiri to tu yii ti mu ki awọn alaṣẹ fasiti mejeeji ni ki awọn olukọ naa lọ rọọkun nile.