Ibadan Traditional worshippers: Àwọn ẹlẹ́sìn ìbílẹ̀ ń bèèrè ọludé lọ́dọọdún fún àyájọ́ ìṣẹ̀ẹ̀ṣe

Awọn ẹlẹsin ibilẹ ẹka ti ipinlẹ Oyo ṣe iwọde niluu Ibadan to jẹ olu ilu ipinlẹ Oyo ni guusu iwọ oorun Naijiria lati kepe ijọba pe ko dẹkun idẹyẹsi awọn ẹlẹsin ibilẹ.

Awọn eeyan naa ti wọn kọwọọ rin lọ sí olu ileeṣẹ ijọba ipinlẹ Oyo ni Agodi nibi ti wọn ti gbe oriṣiriṣi beba lọwọ p\wlu akọle oniruuru.

Die ninu akọle naa ni eyi ti wọn kọ ọ si pe "Ẹ dẹkun idẹyẹsi awọn ẹlẹsin ibilẹ, gbogbo wa ni ipinlẹ Oyo wa fun."

Bakan naa ni wọn rọ awọn kristẹni ati musulumi lati bawọn bẹ ijọba pe ki o maa fawọn naa lọlude bi awọn ẹlẹsin meji to ku.

Akọwe agba ẹgbẹ awọn ẹlẹsin ibilẹ l'Oyo, Ọmọwe Fayemi Fakayode ṣalaye pe iha ti ijọba Gomina Seyi Makinde kọ si awọn ẹlẹsin ibilẹ lo jẹ k'awọn ṣewọde lati fi ẹhonu han.

Ninu ọrọ tiẹ, aarẹ Iṣẹṣe Foundation nipinlẹ Oyo, Baale Olukanmi Egbelade sọ pe ohun ti awọn fẹ ni pe ki ijọba fi awọn si ipo to yẹ k'awọn wa lawujọ.

Aarẹ Egbelade ni "a fẹ ki ijoba kede ọlude logunjo, oṣu kẹjọ lọdọọdun gẹgẹ bi ayajọ ọjọ Iṣẹẹṣe."

Ẹwẹ, oludamọran fun Gomina ipinlẹ Oyo lori ọrọ aabo, Ọgbẹni Odukoya Sunday to bawọn sọrọ ṣeleri lati jiṣẹ wọn fun Makinde.