Okeho Robbery: Ó tó 60 mílíọ̀nù tí àwọn olè jí ṣùgbọ́n a kò rí kọ́bọ̀ gbà padà- Òṣìṣẹ́ banki

Banki ti ado oloro fọ

Ileeṣẹ ọlọpaa ni ipinlẹ Oyo ti ni iwadii ti bẹrẹ ni pẹrẹwu lori ibi ti ọwọ ti awọn adigunjale gbe ni banki to wa ni ilu Okeho wọlẹ si.

Agbẹnusọ awọn ọlọpaa ni ipinlẹ Oyo, Olugbenga Fadeyi lo fi idi ọrọ naa mulẹ fun BBC.

Eyi ko ṣẹyin ẹsun ti ileeṣẹ banki naa ṣe ni awọn araalu gan an lo gba owo ti awọn adigunjale naa jigbe lọ, ti wọn si pin laarin ara wọn.

Amọ, Fadeyii ni awọn ko i tii le fi idi ọrọ naa mulẹ, amọ awọn n fi ọrọ wa awọn adigunjale marun un to wa ni panpẹ awọn lẹnu wo lori bi owo naa ṣe rin.

O ni: ''Gbogbo awọn olè naa kọ ni awọn araalu Okeho sun ni ina, marun un si wa ni agọ ọlọpaa wa

A n ṣewadii lori ibi ti awọn adigunjale naa ti wa, ki lo de ti wọn se fọ banki naa ati owo ti wọn jigbe nibo lo wa?''

Bakan naa ni agbẹnusọ awọn ọlọpaa naa ni awọn yoo ṣe afihan awọn adigunjale naa laipẹ ti awọn yoo si fi abajade iwadii awọn fihan awọn ọlọpaa.

"Àwọn èèyàn ìlú Okeho ló kó gbogbo owó tí wọn rí gbà lọ́wọ́ àwọn adigunjalè tí wọ́n mú"

Wọn ti fẹsun kan awọn olugbe ilu Okeho, to wa ni ijọba ibilẹ Kajola ni ipinlẹ Oyo pe wọn kò obitibiti owo ti wọn gba lọwọ awọn adigunjale to ṣakọlu si banki kan lagbegbe ọhun.

Nigba to n fidi iṣẹlẹ naa mulẹ fun ileeṣẹ iroyin abẹle kan, Baalẹ ilu naa, Rafiu Mustapha sọ pe iwadii ti bẹrẹ lati fi panpẹ ofin mu awọn ọdaran naa.

Bakan naa ni ọkan lara awọn adari banki ti awọn adigunjale ọhun ṣakọlu si, ti ko fẹ ki wọn darukọ oun ṣalaye pe awọn ọlọdẹ ati ọmọ ẹgbẹ OPC ilu naa ṣe ọkan akin lati dojukọ awọn adigunjale ọhun nigba ti wọn n ṣọṣẹ.

O ni awọn eeyan naa kọlu awọn adigunjale ọhun, wọn mu mẹrin lara wọn, wọn si lu wọn ni ilu bara.

Ṣugbọn o ni ọkọ ti awọn adigunjale naa ko owo ti wọn ji si ṣagbako ijamba nigba ti wọn n gbiyaju ati salọ, awọn ara ilu kan si kọlu awọn adigunjale naa ti wọn si ji owo ti awọn ole ọhun ko.

Gẹgẹ bo ṣe sọ pe: "O ṣeni laanu pe iṣẹ akin ti awọn ọlọde ati ọmọ ẹgbẹ OPC ṣe ja sofo nitori iwa ọkanjua ti awọn eeyan ilu naa wu lẹyin iṣẹlẹ naa."

Àkọlé fídíò,

BBC Africa Eye: ìwádìí ìkọ̀ks BBC fihàn pé àwọn kan ń jí ohun èèlò ìdáàbòbò ìjọba tà nígbo

"Owo ti awọn adigunjale naa ji ko din ni ọgọta miliọnu naira, ṣugbọn a ko ri kọbọ gba pada nitori awọn ara ilu to ko gbogbo rẹ tan."

O ṣalaye pe ibanujẹ nla ni pe ko si iyatọ laarin awọn adijale to kọlu ile ifowopamọsi naa atawọn ara ilu to tun ji owo ọhun gba lọwọ wọn.

O ni awọn ara ilu ọhun ni lati ṣatunṣẹ orukọ wọn, bi bẹẹ kọ, o ṣeeṣe ko jẹ pe wọn mọ nipa idigunjale naa.

Àkọlé fídíò,

Teach your children Yoruba: Wo àwọn òyìnbó tó ń kẹ́kọ̀ọ́ èdè Yorùbá ní Michigan, America

Ki lo ti ṣẹlẹ sẹyin?

Àdó olóró míì tún dún ní Báńkì l'Okeho, ènìyàn méjì farapa

Ọlọpaa kan ati araalu miran lo tun farapa ni Ọjọbọ, lẹyin ti ado oloro dynamite tun bu gbamu ni ile ifowopamọ First Bank to wa ni agbegbe Okeho, nipinlẹ Oyo.

Agbegbe yii ni awọn adigunjale ti sọṣẹ ni Ọjọọru, ti ẹmi awọn eniyan kan si lọ si iṣẹlẹ naa.

Awọn araalu naa pejọ pọ, ti wọn si dana sun mẹrin ninu awọn adigunjale naa, ti awọn meji si wa ni panpẹ ọlọpaa.

Àwọn iròyin tì ẹ leè ní ìfẹ̀ síí:

Ni Ọjọbọ ni iroyin gbe e pe, awọn eniyan tun pejọ pọ si banki naa lasiko ti awọn ọlọpaa wa ṣe ayẹwo sibẹ, lati mọ iru ijamba to waye nibẹ.

Iroyin ni ṣe ni awọn eniyan bẹrẹ si ni fariga, ti wọn si n rọ awọn ọlọpaa lati fun awọn ni adigunjale meji to wa ni panpẹ wọn, ki awọn ba le dana sun wọn.

Lasiko naa ni ado oloro dynamite miran tun bu gbamu nibẹ, to si fa ipalara fun ọlọpaa kan ati ọkan lara awọn afẹhonu han naa.

Kọmisana ọlọpaa ipinlẹ Oyo, Nwachukwu Enwonwu ni awọn eniyan naa wa kọju ija si awọn ọlọpaa lasiko yii.

Enwonwu ni oun paṣẹ fun awọn ọlọpaa lati kuro ni agbegbe naa, ki ifẹhonu han ma ba a da rogbodiyan silẹ.

O fikun pe awọn ọlọpaa naa lọ ibomiran, amọ awọn afẹhọnu han naa tun tẹlẹ wọn.

Nitori naa ni wọn ṣe wa kuku kuro ni agbegbe naa patapata, ki ifẹhọnu han ma ba a mu ẹmi ẹnikẹni lọ.

Bakan naa lo ni ileeṣẹ ọlọpaa ti mu awọn adigunjale meji to wa ni panpẹ wọn naa wa si ilu Ibadan fun iwadii ijinlẹ to munadoko.

Àwa àti fijilanté pẹ̀lú ọdẹ́ ìbílẹ̀ ló dojú kọ adigunjalè ní First Bank Okeho - Iléeṣẹ́ ọlọ́pàá

Ọga ọlọpaa ni ipinlẹ Ọyọ, Joe Nwachukwu Ewonwu ti ṣalaye pe, awon agbebọn kan wa digun ja banki First Bank to wa niluu Okeho lole, ni nnkan bii agogo mẹfa abọ Ọjọru.

Àkọlé fídíò,

Ìdílé tí ọkọ da ọmọ síta tóríi ojú Búlùú tí wọ́n ní bá BBC sọ̀rọ̀

Ninu atẹjade kan eyi ti ileeṣẹ ọlọpaa ni ipinlẹ Ọyọ fi sita, eleyii ti alukoro rẹ, SP Fadeyi Oluugbenga fi fọwọsi ni alaye naa ti jẹyọ.

Gẹgẹ bi o ṣe sọ, awọn eroja ado oloro pẹlu awọn ibọn atamatase AK47 ni wọn fi fọ ẹnu ọna banki naa wọle.

Àwọn iròyin tì ẹ leè ní ìfẹ̀ síí:

Amọṣa o fi kun un pe, awọn olopaa kogberegbe atawọn fijilante pẹlu ọdẹ jumọ kọ oju oro s'awọn Adigunjale naa ti wọn si ṣe aṣeyọri.

Lẹyin o rẹyin "ọwọ tẹ mẹta ninu awọn ọlọṣa naa nigba ti ọkọ bọọsi ti wọn n gbe salọ gb'okiti taraalu si da ina sii nigba ti wọn fẹ salọ.

Kọmiṣọna ọlọpaa n'ipinlẹ Ọyọ si tete gbe ikọ ọlọpaa SARS, ọlọpaa kogberegbe MOPOL at'awọn ọlọpaa lagbegbe naa dide lati lọ koju wọn Ki wọn si tọ ipasẹ awọn iyoku wọn lọ.

Ọga ọlọpaa Ewonwu ko ṣai jẹ ko di mimọ faraalu, paapaa àwọn eeyan ipinlẹ Ọyọ pe awọn ọlọpaa yoo maa sa ipa gbogbo nigbakugba lati daabo bo ẹmi ati dukia araalu.

Ọdẹ ìbílẹ̀ ní Okeho pa adigunjalè mẹ́rin tó fọ́ báńkì, aráàlú dáná ṣun wọ́n

Saaju la ti kọkọ mu iroyin wa fun yin nipa isẹlẹ kan to n ja rainrain lori ayelujara, eyi to ni awọn adigunjale mẹrin ni ọwọ palaba wọn segi ni Ọjọru nilu Okeho nipinlẹ Oyo.

Idi ni pe ode ko daa fun wọn nigba ti awọn ọdẹ ibilẹ to wa nilu naa bawọn fija pẹẹta pẹlu ibọn, lasiko ti wọn n digun jale.

Iroyin naa ni isẹlẹ naa buru to bẹẹ ti ẹmi osisẹ ọlọpa kan gan bọ ninu isẹlẹ naa.

Gẹgẹ baa se gbọ, awọn adigunjale naa ni wọn ya lọ sile ifowopamọ ati agọ ọlọpa to wa niwaju ile ifowopamọ naa.

Awọn adigunjale ọhun, ti wọn to meje niye la gbọ pe wọn sisẹ idigunjale ọhun, ti wsn si lo ohun eelo ibugbamu lati ri aaye wọle sinu ile ifowopamọ naa.

Àkọlé fídíò,

Oronpoto Animation: Akin Alabi ní kò dára bí eré aláwòrán fáwọn ọmọdé ṣe jẹ́ aláwọ̀ funfun

Sugbọn ilẹ pooyi fun wọn lọjọ naa, nigba ti awọn ọdẹ ibilẹ to wa nilu naa gba ya wọn, ti mẹta ninu wọn si juba ehoro.

Koda, a gbọ pe awọn araalu ti inu wọn dun si bi awọn ọdẹ naa se mu mẹrin balẹ ninu awọn adigunjale ọhun, tun dana sun oku wọn.

Bakan naa ni wọn n kan saara si awọn ọdẹ atamatase ọhun fun isẹ takuntakun ti wọn se lati fi oju awọn ole naa ri mabo.

BBC Yoruba yoo kan sileesẹ ọlọpaa laipẹ lati mu ẹkunrẹrẹ iroyin wa fun yin nipa isẹlẹ naa.

Ẹ ku oju lọna.

Àwọn ọlọ́pàá, ọdẹ asọ́lé dènà adígunjalè láti fọ́ báǹkì l'Ọsun

Àkọlé àwòrán,

Adígunjalè kùnà láti fọ́ báǹkì l'Ọsun

Ọwọ́ pálábá àwọn afurasi adigunjale ti ṣegi lọ́jọ́ Ajé nígbà tí wọn gbìyànjú lati kọlu ilé ìfòwópamọ kan ní agbègbè Lagere ílùú Ilé-Ifẹ ní ìpínlẹ̀ Ọsun, nígbà táwọn ará adúgbo to ri wọn dìde láti jà.

Àwọn iròyin tì ẹ leè ní ìfẹ̀ síí:

Àkọlé fídíò,

Ìfipábánilòpọ̀: Abiamọ bú sẹ́kún nígbà tí ọkùnrin kan fi tipá bá ọmọ méjì lòpọ̀

Ilé ìfowópamọ méje ló ni ẹ̀ka ní àdúgbò Lagere yii tàwọn adìgunjalè gúnlẹ̀ sí ní dédé aago mẹ́wàá òwúrọ.

Gẹ́gẹ́ bí ọ̀kan nínú àwọn tí ọ̀rọ̀ náà ṣe ojú ẹ ṣe sọ, pé àwọn adigunjalè náà wọ àdúgbò nínú ọkọ̀ ayọ́kẹ́lẹ́ Toyota Camry àti bọọsi kan ti wọn gbé sí ẹgbẹ́ báǹkì náà, tí wọn sì bẹ̀rẹ̀ sí ní yìbọn sí inú afẹ́fẹ́ láti dẹ́rù ba àwọn ènìyàn.

Ẹ̀wẹ̀, àwọn agbófinró tí wọn fi sí ilé ìfowópaamọ àti àwọn ọlọ́dẹ àdúgbò ni wọn fìjà pẹ́ẹ́ta pẹ́lú wọn, èyí sì ló mú kí àwọn olè náà pẹ̀yìnda.

Agbẹ̀nusọ fún Ajọ ọlọpàá ní ìpínlẹ̀ Osun (SP) Folashade Odoro, náà fìdí ọ̀rọ̀ náà múlẹ̀ àtí pé iṣẹ́ sì ń lọ lọ́wọ́ láti mú àwọn afunrasí adigùnjalè náà.