Auxiliary ní òun yóò lé àwọn ọmọ ẹ̀yìn òun tó ń hùwà tọ́ọ̀gì dànù

Auxilliary

Oríṣun àwòrán, The park Management Oyo State

Alaga igbimọ to n ṣe akoso gareeji ọkọ nipinlẹ Oyo, Alhaji Mukaila Lamidi, ti ọpọ eeyan mọ si Auxiliary ti fi ewe ọmọ mọ awọn ọmọ igbimọ rẹ leti, lati yago fun iwa tọọgi ati idaluru.

Bakan naa lo tun dunkooko pe, igbimọ alaṣẹ ti oun n dari ko ni roo ni ẹẹmeji, ko to le ọmọ igbimọ rẹ to ba huwa ọdaran.

Auxiliary leri leka bẹẹ, lasiko ti Ileesẹ ode ati igbokegbodo ọkọ pẹlu ajọ to n ṣe akoso oju popo nipinlẹ Oyo, ṣeto ilanilọyẹ fawọn ọmọ igbimọ alakoso gareeji, lori bi isẹ wọn ko fi ni lọwọ jagidijagan ninu.

Auxiliary ni "A ti n gbadun alaafia nipinlẹ Oyo lati igba ti mo ti n dari igbimọ Alakoso gareeji, mo si n rọ awọn ọmọ igbimọ mi lati lati ri daju pe alaafia naa n tẹsiwaju."

Oríṣun àwòrán, The park Management Oyo State

Auxiliary tun ni oun ko ni faramọ iwakiwa to le ta epo si aṣọ aala awọn, tabi ba iṣẹ rere tawọn ti n tiraka lati ṣe jẹ lati ipasẹ iwa idaluru.

Alaga igbimọ alakoso gareeji ọkọ naa wa gba awọn ọmọ igbimọ rẹ nimọran lati maa kan si awọn ọlọpaa atawọn Ileesẹ agbofinro lagbegbe wọn, ki alaafia lee jọba nibẹ.

NURTW Oyo: Ọwọ́ bàtá Auxiliary tó ń ró ní àrójù, leè ya láìpẹ́ - Ìjọba Oyo dúnkookò

Yoruba ni bi ọwọ Bàtá ba ti n le ni aroju, o setan to fẹ ya ni.Asamọ yii ni ijọba ipinlẹ Oyo n pa lowe lowe fun asaaju igbimọ to n ṣe akoso gareeji ọkọ ni ipinlẹ Oyo, Alhaji Mukaila Lamidi, ti ọpọ eeyan mọ si Auxiliary.

Oríṣun àwòrán, The park Management Oyo State

Nigba to n fi ewe ọmọ mọ Auxiliary leti, Kọmisana fun iṣẹ ode ati igboke-gbodo ọkọ nipinlẹ Oyo, Ọjọgbọn Raphael Afonja ni eti ìjọba ipinlẹ Oyo ti kun, lori awọn iwa idaluru ti asaaju igbimọ alakoso gareeji ọkọ ati awọn ọmọlẹyin rẹ n hu nigboro.

Afonja, lasiko to n kopa lori eto ori redio kan nilu Ibadan ni, ko si ẹni ti ijọba ko lee paarọ, yoo si daa ki Auxiliary ati isọmọgbe rẹ so ewe gbejẹ mọ wọ.

"Eti ijọba Oyo ti kun nipa iwa ipanle ti awọn ọmọlẹyin Auxiliary n ṣe, mo wa n fi akoko yii kesi oun ati awọn ọmọ ẹyin rẹ lati sinmi agbaja, bi bẹẹ kọ, ìjọba yoo gba ipo naa lọwọ rẹ nitori ko si ẹni to ga ju ofin lọ."Bẹẹ ba gbagbe, ọpọ igba ni ariwo ti sọ nigboro ilu Ibadan nipa bi awọn ọmọlẹyin Auxiliary ṣe n hu iwa ipa ni awọn ibudokọ ti wọn ti n ṣíṣẹ.

NURTW Oyo: Ìjọba Ọyọ ní awakọ̀ kankan kò ní tẹ̀lé àṣẹ yíyan iṣẹ́ lódì táwọn NURTW fi ń halẹ̀

Oríṣun àwòrán, Others

Ijọba ipinlẹ ọyọ ti fesi lori idunkoko ẹgbẹ awakọ ero NURTW lẹkun guusu Naijiria to n fẹ kijọba yi ipinnu rẹ pada lori yiyan awọn alakoso gareji ọkọ.

Lasiko to n ba BBC Yoruba sọrọ, akọwe feto iroyin fun gomina, Taiwo Adisa, to gbẹnu Seyi Makinde sọrọ salaye pe, awọn awakọ nipinlẹ Ọyọ nikan lo lasẹ lati sọrọ lori igbesẹ tijọba gbe lati yan awọn awọn adari ọkọ sawọn gareji gbogbo nipinlẹ naa.

Ijọba Ọyọ ni lọdọ awọn, ko sẹni to mọ okolo awọn ẹgbẹ NURTW lẹkun iwọ oorun guusu Naijiria lọyọ, tori wọn ko fi orukọ silẹ lọdọ awọn, oye ohun to si n waye nipinlẹ naa ko ye wọn to.

Oríṣun àwòrán, Others

Ijọba ni ohun ti ko kan awọn asaaju ẹgbẹ awakọ ero naa ni wọn n dasi, bẹẹ si ni igbesẹ ijọba Ọyọ lati maa gba owo ni ẹẹkan lojumọ lo dun mọ awọn awakọ yika ipinlẹ naa ninu, lodi si ohun to n waye tẹlẹ.

"Tẹlẹtẹlẹ, awọn awakọ ero nipinlẹ Ọyọ lee sanwo fun irinajo kan ni ọna meji, orita bii mẹta si ni wọn yoo ti sanwo ita naa. Apo awọn eeyan kan si ni owo naa n lọ, eyi ti ko dara to."

Àwọn iròyin tì ẹ leè ní ìfẹ̀ síí:

O fikun pe, igbesẹ tijọba gbe naa lo n mu ominira ba awọn awakọ gan ni, owo ẹẹkan pere ti wọn ba san wa lati aarọ titi di alẹ, pẹlu afikun pe awọn to n dunkoko mọ ijọba ko mọ ohun ti wọn n sọ ni.

Àkọlé fídíò,

Female Driver: Sokunbi ni obìnrin àwakọ̀ Dáńfó l‘Eko, tó ń lọ̀ láti ìpínlẹ̀ kan sí òmíì

"Agbeyẹwo tijọba n se yoo mu ilọsiwaju ba awọn awakọ, ti ijọba yoo si nawo fun atunse awọn gareji ọkọ wa, ti iyatọ yoo si ba wọn laarin ọdun kan, yatọ si bi awọn eeyan kan se maa n da owo gareji si apo ara wọn.".

Nigba to n salaye lori idunkooko pe awọn asaaju ọlọkọ naa yoo pasẹ fawọn awakọ lati dasẹ silẹ, ijọba Ọyọ ni ala ti ko lee sẹ ni idunkooko naa, ko si si awakọ kankan nipinlẹ Ọyọ ti yoo tẹle asẹ awọn adari ẹgbẹ NURTW naa.

"Igbesẹ ijọba yoo tubọ mu ki owo pọ ni apo awakọ ero kọọkan ni, ti yoo si mu si gba owo kuro lọwọ awọn asaaju ẹgbẹ. Ti igbesẹ naa ko ba si tẹ awọn asaaju ẹgbẹ lọrun, ọkọ tiwọn nikan, to jẹ ẹtahoro ni wọn yoo gbe kuro loju popo, tori ko si awakọ to ya owo ra ọkọ ara rẹ, ti yoo gbọrọ si wọn lẹnu."

Oríṣun àwòrán, Others

Ijọba Ọyọ ni oun ko di isẹ awakọ lọwọ rara, o si rọ awọn awakọ ero lati maa ba isẹ wọn lọ, ki wọn si gbọn eti wọn si ohun ti awọn olori ẹgbẹ to n gba owo lọwọ wọn n sọ.

Bẹẹ ba gbagbe, laipẹ yii ni ẹgbẹ NURTW lẹkun iwọ oorun guusu Naijiria ni oun ko faramọ iyansipo alaga tẹlẹ fẹgbẹ awakọ ero nipinlẹ Ọyọ, Mukaila Lamidi, ti gbogbo eeyan mọ si Auviliary gẹgẹ bii oludari awọn alakoso gareji tijọba sẹsẹ yan.

Oríṣun àwòrán, Seyi Makinde

Awọn asaaju ẹgbẹ ọlọkọ ero naa, ninu eyi taa ti ri MC Oluomo tun n dunkooko pe awọn yoo ni kawọn awakọ ero dasẹ tilẹ tijọba Ọyọ ko ba tẹle ohun tawọn n fẹ laarin ọjọ meje.